ବେଙ୍ଗାଲୁରୁ: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦରମେୟାଙ୍କୁ ମାଙ୍ଗାଲୁରୁ ଗସ୍ତ କରିବା ଲାଗି ପୁଲିସ ପକ୍ଷରୁ ବାରଣ କରାଯିବା ପରେ ଏହାକୁ ନେଇ ସିଦ୍ଦରମେୟା ରାଜ୍ୟ ବିଜେପିକୁ ଟାର୍ଗେଟ କରିଛନ୍ତି। ସେ ସିଧାସଳଖ ବି.ଏସ. ୟେଦ୍ଦୁରପ୍ପାଙ୍କ ସରକାରକୁ ଏଥିପାଇଁ ଦାୟୀ କରିବା ସହିତ ବିଜେପିଠାରୁ ଆଇନଶୃଙ୍ଖଳା ଜ୍ଞାନ ଶିଖିବାର ଆବଶ୍ୟକତା ନାହିଁ ବୋଲି କହିଛନ୍ତି।
ଶନିବାର ସକାଳେ ମାଙ୍ଗାଲୁରୁ ପୁଲିସ କମିଶନର ସିଦ୍ଦରମେୟାଙ୍କୁ ନୋଟିସ ଜାରି କରି ମାଙ୍ଗାଲୁରୁ ଗସ୍ତରେ ନ ଆସିବା ପାଇଁ କହିଥିଲେ। ସେ ମାଙ୍ଗାଲୁରୁ ଆସିଲେ ଆଇନଶୃଙ୍ଖଳା ପରିସ୍ଥିତି ବିଗିଡ଼ିଯିବ ବୋଲି କହିଥିଲେ। ଏହା ପରେ ସିଦ୍ଦରମେୟା ପ୍ରଶାସନକୁ ନିନ୍ଦା କରିଛନ୍ତି। ସେ କହିଛନ୍ତି, ନୋଟିସ ଅନୁସାରେ ମୁଁ ଟ୍ରେନ, ବସ୍ କିମ୍ବା କାରରେ ମାଙ୍ଗାଲୁରୁ ଯାଇପାରିବ ନାହିଁ। ମୁଁ ଜାଣିପାରୁ ନାହିଁ ରାଜ୍ୟରେ କିମ୍ବା କେନ୍ଦ୍ରରେ ଗଣତନ୍ତ୍ର ଅଛି କି ନାହିଁ। ଯଦି ସେମାନଙ୍କ ପାଇଁ ପରିସ୍ଥିତି ଭଲ ଅଛି, ତେବେ ମୋ ପାଇଁ କାହିଁକି ନୁହେଁ। ଅନ୍ୟପଟେ ମୁଖ୍ୟମନ୍ତ୍ରୀ ବି.ଏସ. ୟେଦ୍ଦୁରପ୍ପା ଶନିବାର ମାଙ୍ଗାଲୁରୁ ଗସ୍ତ କରିବାର କାର୍ଯ୍ୟକ୍ରମ ରହିଛି। ମୁଖ୍ୟମନ୍ତ୍ରୀ ସେଠାକାର ସ୍ଥିତି ବିଷୟରେ ବରିଷ୍ଠ ଅଧିକାରୀମାନଙ୍କ ସହିତ ଆଲୋଚନା କରିବେ। ତାଙ୍କ ସହିତ ଉପମୁଖ୍ୟମନ୍ତ୍ରୀ ଗୋବିନ୍ଦ କାରଜୋଲ ଏବଂ ଗୃହମନ୍ତ୍ରୀ ବସୱାରାଜ ବୋମେଇ ମଧ୍ୟ ଗସ୍ତ କରିବେ।
