ଇସ୍ରାଏଲ ଉପରେ ପାଲେଷ୍ଟାଇନ ଆତଙ୍କବାଦୀଙ୍କ ରକେଟ୍‌ ମାଡ଼, ଜବାବୀ କାର୍ଯ୍ୟାନୁଷ୍ଠାନରେ ଆତଙ୍କୀ କମାଣ୍ଡର ନିହତ

ତେଲ୍‌ ଅବୀବ: ପାଲେଷ୍ଟାଇନ ଆତଙ୍କୀ ସଂଗଠନ ହମାସ ପକ୍ଷରୁ ଇସ୍ରାଏଲ ଉପରେ ଆକ୍ରମଣ କରାଯାଇଛି। ଆତଙ୍କବାଦୀ ସଂଗଠନ ପକ୍ଷରୁ ଇସ୍ରାଏଲର ଏକ ବ୍ୟସ୍ତବହୁଳ ରାସ୍ତା ଉପରେ ରକେଡ୍‌ ମାଡ଼ କରାଯାଇଛି। ଏଥିରେ କେହି ମୃତାହତ ହୋଇଥିବା ଜଣାପଡ଼ିନାହିଁ। ତେବେ ଆକ୍ରମଣ ସମୟର ଭୟାନକ ଦୃଶ୍ୟର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ରକେଟ୍‌ଟି ଏକ କାର୍‌ ନିକଟରେ ମାଡ଼ ହୋଇଥିବାବେଳେ କାରଟି ଏଥିରୁ ଅଳ୍ପକେ ବର୍ତ୍ତି ଯାଇଥିଲା।

ଅନ୍ୟପଟେ ଇସ୍ରାଏଲ ପକ୍ଷରୁ ଏହା ବିରୋଧରେ ଜବାବୀ କାର୍ଯ୍ୟାନୁଷ୍ଠାନ ନିଆଯାଇଛି। ଇସ୍ରାଏଲ ସେନା ୱେଷ୍ଟ ବ୍ୟାଙ୍କ ଏବଂ  ଗାଜାର ବିଭିନ୍ନ ସ୍ଥାନରେ ଥିବା ଆତଙ୍କବାଦୀ ସଂଗଠନ ହମାସର କେତେକ ଶିବିର ଉପରେ ବୋମା ମାଡ଼ କରିଛି। ଏଥିରେ ହମାସର ଜିହାଦ କାମଣ୍ଡର ନିହତ ହୋଇଥିବା ଜଣାପଡ଼ିଛି। ନିହତ କମାଣ୍ଡର ଅନେକ ନାଗରିକ ଏବଂ ଇସ୍ରାଏଲ ଯବାନଙ୍କ ହତ୍ୟା ମାମଲାରେ ସମ୍ପୃକ୍ତ ରହିଥିବା ଇସ୍ରାଏଲ ପକ୍ଷରୁ କୁହାଯାଇଛି। ଇସ୍ରାଏଲ ସେନା ପକ୍ଷରୁ କୁହାଯାଇଛି ଯେ, ଇସଲାମିକ ଜିହାଦ ଗାଜାରେ ଏକ ଆତଙ୍କୀ ସଂଗଠନ ରହିଛି। ଇସ୍ରାଏଲକୁ କ୍ଷତି ପହଞ୍ଚାଇବା ଏହି ସଂଗଠନର ଲକ୍ଷ୍ୟ। ସଂଗଠନ ଆଜି ଇସ୍ରାଏଲ ଉପରେ ୧୨ରୁ ଅଧିକ ରକେଡ୍‌ ମାଡ଼ କରିଛି, ଯାହାର କଡ଼ା ଜବାବ ଦିଆଯାଇଛି।