କୋଲକାତା: ପଶ୍ଚିମବଙ୍ଗର କୋଲକାତାରେ ପୂର୍ବତନ ମିସ୍ ଇଣ୍ଡିଆ ଉଶଷୀ ସେନଗୁପ୍ତାଙ୍କୁ କେତେଜଣ ଅସାମାଜିକ ଯୁବକ ଦୁର୍ବ୍ୟବହାର କରିଛନ୍ତି। ମଙ୍ଗଳବାର ରାତିରେ ସେ କାମ ସାରି ଏକ କ୍ୟାବ୍ରେ ଘରକୁ ଫେରୁଥିବାବେଳେ ଅସାମାଜିକ ଯୁବକମାନେ ଗାଡ଼ିକୁ ଅଟକାଇ ଡ୍ରାଇଭରଙ୍କୁ ମାରପିଟ୍ କରିବା ସହ ତାଙ୍କୁ ଦୁର୍ବ୍ୟବହାର ପ୍ରଦର୍ଶନ କରି ହଙ୍ଗାମା କରିଥିଲେ। ଏହି ଘଟଣାରେ ପୁଲିସ ୭ ଅଭିଯୁକ୍ତଙ୍କୁ ଗିରଫ କରିଛି।
ଉଶଷୀ ଫେସ୍ବୁକରେ ଏକ ପୋଷ୍ଟ କରି ନିଜ ଅଭିଯୋଗ ଜଣାଇବା ସହ କୋଲାକାତା ପୁଲିସର ଅସହଯୋଗକୁ ନେଇ ଅସନ୍ତୋଷ ପ୍ରକାଶ କରିଛନ୍ତି। ଅଭିଯୋଗ ମୁତାବକ, ଉଶଷୀ ରାତି ପ୍ରାୟ ୧୧ଟା ୪୦ରେ କାମ ସାରି କ୍ୟାବରେ ଘରକୁ ଫେରୁଥିଲେ। ଏଲିଗିନ ରାସ୍ତା ନିକଟରେ କେତେଜଣ ଯୁବକ ବାଇକରେ ଆସି ତାଙ୍କ ଗାଡ଼ିକୁ ଧକ୍କା ମାରିଥିଲେ। ପରେ ଡ୍ରାଇଭରଙ୍କୁ ବାହାରକୁ ଟାଣିନେଇ ମାଡ଼ ମାରିଥିଲେ। ସେହି ବାଟ ଦେଇ ଯାଉଥିବା ଜଣେ ପୁଲିସ କର୍ମଚାରୀଙ୍କ ନିକଟକୁ ଉଶଷୀ ଦୌଡ଼ି ଯାଇ ସହାୟତା ମାଗିଥିଲେ। କିନ୍ତୁ ଏହା ତାଙ୍କ ଥାନା ଅଞ୍ଚଳରେ ଆସୁ ନ ଥିବା କହି ମନା କରିଥିଲେ। ଉଶଷୀ ବହୁ ଅନୁରୋଧ କରିବା ପରେ ସେ ଅଭିଯୁକ୍ତଙ୍କୁ ଧରିବାକୁ ଉଦ୍ୟମ କରିଥିଲେ। କିନ୍ତୁ ସେମାନେ ତାଙ୍କୁ ଧମକାଇ ଫେରାର ହୋଇଯାଇଥିଲେ। ଏହା ପରେ ଉଶଷୀ କ୍ୟାବରେ ତାଙ୍କ ସାଙ୍ଗ ସହିତ ଘରକୁ ଫେରିଥିଲେ। ମାତ୍ର ପରେ ସେହି ଅସାମାଜିକ ଯୁବକମାନେ ତାଙ୍କୁ ପୁଣି ପିଛା କରିଥିଲେ। ଉଶଷୀ ତାଙ୍କ ଘର ନିକଟରେ ପହଞ୍ଚିବା ପରେ ଯୁବକମାନେ ସେଠାରେ ତାଙ୍କୁ ଦୁର୍ବ୍ୟବହାର କରିବା ସହିତ ମାରପିଟ୍ କରିଥିଲେ। ସ୍ଥାନୀୟ ଲୋକେ ପହଞ୍ଚି ଯିବାରୁ ସେମାନେ ଖସି ପଳାଇଥିଲେ। ପରେ ସେ ଏ ନେଇ ଥାନାରେ ଅଭିଯୋଗ କରିଥିଲେ।
