ଏନଆଇଟି କନିଷ୍ଠ ସହାୟକ ପଦ ପାଇଁ ପରୀକ୍ଷା ଦେଉଥିଲେ ୪ ପରୀକ୍ଷାର୍ଥୀ, ଗିରଫ କଲା ରାଉରକେଲା ପୁଲିସ

ରାଉରକେଲା: ନ୍ୟାସନାଲ ଇନଷ୍ଟିଚ୍ୟୁଟ ଅଫ ଟେକ୍ନୋଲୋଜି(ଏନଆଇଟି) ରାଉରକେଲା କ୍ୟାମ୍ପସରୁ ୪ ନକଲି ପରୀକ୍ଷାର୍ଥୀଙ୍କୁ ପୁଲିସ ଅଟକ ରଖିଛି। ଅଣଶିକ୍ଷକ କର୍ମଚାରୀ ପାଇଁ ଚାଲିଥିଲାବେଳେ ନକଲି ପରୀକ୍ଷାର୍ଥୀ ପରୀକ୍ଷା ଦେଉଥିବା ଜଣାପଡ଼ିଥିଲା। ପରୀକ୍ଷାରେ ବସିଥିଲେ ୪ ନକଲି ପ୍ରାର୍ଥୀ ବସିଥିବା ଜଣାପଡ଼ିଲା ପରେ ସେକ୍ଟର ୩ ଥାନାରେ ଏନଆଇଟି କର୍ତ୍ତୃପକ୍ଷ ଏତଲା ଦେଇଛନ୍ତି।

ରାଉରକେଲା ସ୍ଥିତ ଏନଆଇଟିରେ କନିଷ୍ଠ ସହାୟକ ନିଯୁକ୍ତି ପାଇଁ ପରୀକ୍ଷା ଚାଲୁଥିବା ବେଳେ ୪ ନକଲି ପରୀକ୍ଷାର୍ଥୀ ଧରାପଡ଼ିଛନ୍ତି। ଏହି ଚାରି ଅଭିଯୁକ୍ତ ହେଉଛନ୍ତି- ପୁନିତ ସିଂହ, ଗୌରବ ଚୌହାନ, ମନିଷ କୁମାର ଏବଂ ସୁନୀଲ। ଏମାନେ ସମସ୍ତେ ହରିୟାଣା ରାଜ୍ୟର ବୋଲି ଜଣାପଡ଼ିଛି।

ଗତକାଲି ପରୀକ୍ଷା ଚାଲିଥିବା ବେଳେ ଏହି ୪ଜଣଙ୍କୁ ସନ୍ଦେହ କରି ଏନଆଇଟି କର୍ତ୍ତୃପକ୍ଷ ଅଟକ ରଖିଥିଲେ। ଏହାପରେ ଏନଆଇଟି କର୍ତ୍ତୃପକ୍ଷ ଏନେଇ ସେକ୍ଟର-୩ ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ପୁଲିସ୍ ୪ ଅଭିଯୁକ୍ତଙ୍କୁ ଥାନାକୁ ଆଣି ଅଟକ ରଖି ପଚରାଉଚରା କରିବା ପରେ ଆଜି ଗିରଫ କରିଛି। ତେବେ ସେମାନେ କେଉଁ ପ୍ରାର୍ଥୀଙ୍କ ପାଇଁ ପରୀକ୍ଷା ଦେବାକୁ ଆସିଥିଲେ, ବଦଳ ପରୀକ୍ଷାର୍ଥୀ ହେବା ପାଇଁ ସେମାନଙ୍କୁ କେତେ ଟଙ୍କା ମିଳିଥିଲା, ସେ ନେଇ ପୁଲିସ କିଛି କହି ନାହିଁ। ଏ ସବୁ ଦିଗରେ ତଦନ୍ତ ଜାରି ରହିଛି ବୋଲି ରାଉରକେଲା ଡିଏସ୍‌ପି ପୁଷ୍ପାଞ୍ଜଳି ଲିଙ୍ଗି ପ୍ରକାଶ କରିଛନ୍ତି।