ପ୍ରୟାଗରାଜ: ଉତ୍ତରପ୍ରଦେଶ ସରକାର ଏବଂ ପ୍ରଶାସନ ପକ୍ଷରୁ ବାରମ୍ବାର ଅନୁରୋଧ ସତ୍ବେ ଦିଲ୍ଲୀ ମରକଜରେ ସାମିଲ ହୋଇଥିବା ଜମାତ ସଦସ୍ୟମାନେ ନିଜ ବିଷୟରେ ସରକାରଙ୍କୁ ସୂଚନା ଦେଉନାହାନ୍ତି। ବରଂ ଲୁଚି ରହୁଛନ୍ତି। ଏହି ସୂଚନା ମିଳିବା ପରେ ଉତ୍ତରପ୍ରଦେଶ ପୁଲିସ ଆଲାହାବାଦ ବିଶ୍ଵବିଦ୍ୟାଳୟର ଜଣେ ପ୍ରଫେସର ଓ ୧୬ ବିଦେଶୀ ଜମାତ ସଦସ୍ୟଙ୍କ ସମେତ ୩୦ ଜଣଙ୍କୁ ଗିରଫ କରିଛି। ସୋମବାର ବିଳମ୍ବିତ ରାତିରେ ପୁଲିସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇ ସେମାନଙ୍କୁ ଗିରଫ କରାଯାଇଛି।
ଫରେନର୍ସ ଆକ୍ଟ ଅଧୀନରେ ବିଦେଶୀମାନଙ୍କୁ ଗିରଫ କରାଯାଇଥିବାବେଳେ ଜମାତ ସଦସ୍ୟମାନଙ୍କୁ ଗୁପ୍ତ ଭାବେ ଆଶ୍ରୟ ଦେଇଥିବା ଅଭିଯୋଗରେ ପ୍ରଫେସରଙ୍କୁ ଗିରଫ କରାଯାଇଛି। ଶିବକୁଟୀର ରସୁଲାବାଦରେ ରହୁଥିବା ଆଲାହାବାଦ ବିଶ୍ଵବିଦ୍ୟାଳୟର ରାଜନୀତି ବିଜ୍ଞାନ ବିଭାଗ ପ୍ରଫେସର ଦିଲ୍ଲୀରେ ଆୟୋଜିତ ତବଲୀଗୀ ଜମାନରେ ସାମିଲ ହେବା ପରେ ଘରକୁ ଫେରି ଚୁପଚାପ ରହୁଥିବା ଖବର ମିଳିଥିଲା। ଏହା ପରେ ତାଙ୍କୁ ଏବଂ ତାଙ୍କ ପରିବାରକୁ କ୍ବାରେଣ୍ଟାଇନରେ ରଖାଯାଇଥିଲା।
