ସମାଜ ଡିଜିଟାଲ ଡେସ୍କ: ବର୍ଷକରେ ୨୫ ବାଘ ନିଖୋଜ। କୁଆଡ଼େ ଗଲେ ଏତେ ସଂଖ୍ୟକ ବାଘ। ଶିକାରୀଙ୍କ ଦ୍ଵାରା ଶିକାର ହୋଇଛନ୍ତି ନା ଆକସ୍ମିକ ମୃତ୍ୟୁ ଘଟିଛି ? ଯାହାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ଦେଶର ପ୍ରମୁଖ ଜାତୀୟ ଉଦ୍ୟାନ ରାଜସ୍ଥାନର ରନ୍ଥଭୌର ଜାତୀୟ ଉଦ୍ୟାନରେ ବାଘ ସଂଖ୍ୟା ହ୍ରାସ ପରେ ଏବେ ପରିବେଶବିତମାନେ ସରକାରଙ୍କୁ ଟାର୍ଗେଟ କରିଛନ୍ତି। ଏହି ତଥ୍ୟ ସାମ୍ନାକୁ ଆସିବା ପରେ ବନ ବିଭାଗ ପକ୍ଷରୁ ଘଟଣାର ତଦନ୍ତ ପାଇଁ ୩ ଜଣିଆ କମିଟି ଗଠନ କରାଯାଇଛି।
ଗତବର୍ଷ ଏହି ଜାତୀୟ ଉଦ୍ୟାନରେ ୭୫ ବାଘ ରହିଥିବା ଗଣନା କରାଯାଇଥିଲା। ଚଳିତବର୍ଷ ଏହି ସଂଖ୍ୟା ୫୦ରେ ପହଞ୍ଚିଛି। ଆର୍ଥାତ ୨୫ ବାଘଙ୍କ ପତ୍ତା ମିଳିନାହିଁ। କେବଳ ମେ ୧୭ରୁ ସେପ୍ଟେମ୍ବର ୩୦ ମଧ୍ୟରେ ୧୪ ବାଘ ନିଖୋଜ ହୋଇଯାଇଛନ୍ତି। ପ୍ରଥମ ଥର ଲାଗି ଏତେ ସଂଖ୍ୟକ ବାଘ ଗୋଟିଏ ଜାତୀୟ ଉଦ୍ୟାନରୁ ନିଖୋଜ ହୋଇଯାଇଛନ୍ତି। ୨୦୧୯ରେ ଏଠାରେ ବର୍ଷକରେ ୧୩ ବାଘ ନିଖୋଜ ହେବା ନେଇ ରିପୋର୍ଟ ଜାରି ହୋଇଥିଲା। ତଦନ୍ତକାରୀ କମିଟି ପକ୍ଷରୁ ବାଘଙ୍କ ଉପରେ ନଜର ରଖିବା ଲାଗି କରାଯାଇଥିବା ବ୍ୟବସ୍ଥାର ସମୀକ୍ଷା କରାଯିବ। ଯଦି ଉଦ୍ୟାନ ଅଧିକାରୀଙ୍କ ଦ୍ଵାରା କୌଣସି ତ୍ରୁଟି ହୋଇଥିବ ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
