କରୋନା: ୨୪ ଘଣ୍ଟାରେ ଆମେରିକାରେ ୨ ହଜାର, ଫ୍ରାନ୍ସରେ ୧୪୧୭ ମୃତ

ୱାଶିଂଟନ: କରୋନା ଭୂତାଣୁ ଆମେରିକାରେ ଭୟଙ୍କର ପରିସ୍ଥିତି ସୃଷ୍ଟି କରିଛି। ଏଠାରେ ଦିନକୁ ଦିନ ଆକ୍ରାନ୍ତ ଏବଂ ମୃତକଙ୍କ ସଂଖ୍ୟା ଦ୍ରୁତଗତିରେ ବଢ଼ିବାରେ ଲାଗିଛି। ଗତ ୨୪ ଘଣ୍ଟା ଭିତରେ ଦେଶରେ ୨ ହଜାର ଆକ୍ରାନ୍ତଙ୍କ ମୃତ୍ୟୁ ଘଟିବା ପରେ ଟ୍ରମ୍ପ ପ୍ରଶାସନର ଚିନ୍ତା ବଢ଼ିଯାଇଛି। ଏବେ ସମଗ୍ର ଦେଶରେ ଆକ୍ରାନ୍ତଙ୍କ ସଂଖ୍ୟା ୪ ଲକ୍ଷ ଟପିଯାଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କରୋନା ଭୂତାଣୁର ମୁକାବିଲା କରିବାରେ ଏକପ୍ରକାର ବିଫଳ ହୋଇଛନ୍ତି। ଦେଶର ନ୍ୟୁୟର୍କ ସହର କରୋନା ଯୋଗୁ ସବୁଠୁ ବେଶୀ ପ୍ରଭାବିତ ହୋଇଛି। ଅନ୍ୟପଟେ ସାରା ବିଶ୍ବରେ କରୋନା ମୃତ୍ୟୁ ସଂଖ୍ୟା ୮୨ ହଜାର ଅତିକ୍ରମ କରିଛି। ଆକ୍ରାନ୍ତଙ୍କ ସଂଖ୍ୟା ୧୪ ଲକ୍ଷ ଟପିଯାଇଛି। ସେହିପରି ଫ୍ରାନ୍ସ ଏବଂ ସ୍ପେନରେ ବି ସ୍ଥିତି ଗମ୍ଭୀର ରହିଛି। ଫ୍ରାନ୍ସରେ ମୃତ୍ୟୁ ସଂଖ୍ୟା ୧୦ ହଜାର ଟପିଥିବାବେଳେ ସ୍ପେନରେ ୧୩ ହଜାର ଅତିକ୍ରମ କରିଛି। ଫ୍ରାନ୍ସରେ ଗତ ୨୪ ଘଣ୍ଟା ଭିତରେ ୧୪୧୭ ଜଣଙ୍କ ମୃତ୍ୟୁ ଘଟିଛି। ଏଠାରେ ଆକ୍ରାନ୍ତ ସଂଖ୍ୟା ୧ ଲକ୍ଷ ୯ ହଜାର ଟପିଛି।