ଭୁବନେଶ୍ୱର : ଓଡ଼ିଶା ଉପରେ ଏକ ଟ୍ରଫ୍ ଲାଇନ୍ ସୃଷ୍ଟି ହୋଇଛି। ତାହାର ପ୍ରଭାବରେ ୪/୫ ଦିନ ପର୍ଯ୍ୟନ୍ତ କିଛି ସ୍ଥାନରେ ବର୍ଷା ହେବ। ବିଶେଷକରି ଦକ୍ଷିଣ ଓ ଉପକୂଳ ଓଡ଼ିଶାର କିଛି ଜିଲାରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ। ତେବେ ୧୮ ତାରିଖ ପରଠୁ ବର୍ଷାର ପରିମାଣ ବଢ଼ିବ ବୋଲି ଭୁବନେଶ୍ୱର ସ୍ଥିତ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ କୁହାଯାଇଛି।
ଦକ୍ଷିଣ ପଶ୍ଚିମ ମୌସୁମି ବାୟୁ ଦୁର୍ବଳ ହେବା କାରଣରୁ ବର୍ଷାରେ ପରିବର୍ତ୍ତନ ଆସିଛି। ଦିନବେଳା ପ୍ରବଳ ଗରମ ଓ ଗୁଳୁଗୁଳି ଅନୁଭୂତ ହେବା ସହ ମୁଣ୍ଡଫଟା ଖରା ହେବା କଥା । ତେବେ ଚଳିତ ବର୍ଷ ୩୧.୫ ପ୍ରତିଶତ ବର୍ଷା ହ୍ରାସ ପାଇଛି ।
ଜୁନ୍ରେ ଓଡ଼ିଶାରେ ହାରାହାରି ୯.୯ ଦିନ ବର୍ଷା ହେବା କଥା। ଏଥର ଏହାର ବ୍ୟତିକ୍ରମ ଦେଖାଦେଇଛି । ଚଳିତ ବର୍ଷ ଜୁନ୍ ମାସରେ ୭.୪ ଦିନ ବର୍ଷା ହୋଇଥିବା ରେକର୍ଡ କରାଯାଇଛି। ରାଜ୍ୟର ୩୦ଟି ଜିଲା ମଧ୍ୟରୁ ଉପରୋକ୍ତ ମାସରେ ଯାଜପୁରରେ ସର୍ବାଧିକ ୨୫୩.୭ ମିମି ବର୍ଷା ହୋଇଥିବାବେଳେ ଗଜପତିରେ ସର୍ବନିମ୍ନ ୫୯.୮ ମିମି ବର୍ଷା ହୋଇଥିବା ଜଣାପଡ଼ିଛି। ଯାଜପୁର, କୋରାପୁଟ, ଢେଙ୍କାନାଳ ଓ ନବରଙ୍ଗପୁର, ଏହି ୪ଟି ଜିଲାରେ ସାଧାରଣ ବର୍ଷା ହୋଇଛି। ୧୮ଟି ଜିଲାରେ ବର୍ଷା ହ୍ରାସ ପାଇ ୧୯ ରୁ ୩୯ ପ୍ରତିଶତ ମଧ୍ୟରେ ରହିଛି । ବଲାଙ୍ଗୀର, କେନ୍ଦୁଝର, ନୂଆପଡ଼ା, ନୟାଗଡ଼, କନ୍ଧମାଳ ଓ ସୁନ୍ଦରଗଡ଼ ଜିଲାରେ ୩୯ରୁ ୫୯ ପ୍ରତିଶତ ବର୍ଷା ହ୍ରାସ ପାଇଛି। ଗଜପତି ଓ ରାୟଗଡ଼ାରେ ସର୍ବନିମ୍ନ ବର୍ଷା ହୋଇଛି । ବ୍ଲକ ଦୃଷ୍ଟିରୁ ଦେଖିଲେ, ରାଜ୍ୟରେ ୧୯ଟି ବ୍ଲକରେ ଅଧିକ ବର୍ଷା ହୋଇଥିବାବେଳେ ୭୩ଟି ବ୍ଲକରେ ସାଧାରଣ, ୯୦ଟି ବ୍ଲକରେ ସାମାନ୍ୟ, ୮୫ଟି ବ୍ଲକରେ ସର୍ବନିମ୍ନ ଓ ୪୭ଟି ବ୍ଲକରେ ନାମକୁ ମାତ୍ର ବର୍ଷା ହୋଇଥିବା ପାଣିପାଗ ବିଭାଗ ପକ୍ଷରୁ କୁହାଯାଇଛି।
Comments are closed.