‘ସାଇବର ଅପରାଧରୁ ଲୋକଙ୍କୁ ସୁରକ୍ଷା ଦେବାକୁ ସରକାର ପ୍ରତିଶ୍ରୁତିବଦ୍ଧ’

ଭୁବନେଶ୍ୱର : ସାଇବର ଅପରାଧ ବୃଦ୍ଧି ପାଇବାରେ ଲାଗିଛି। ଏଣିକି ସାଧାରଣ ଜନତାଙ୍କୁ ସାଇବର ଅପରାଧରୁ ସୁରକ୍ଷା ଦେବେ ସରକାର। ଏଥିପାଇଁ ଅତ୍ୟାଧୁନିକ ଜ୍ଞାନକୌଶଳରେ ପରିପୂର୍ଣ୍ଣ ୧୪ଟି ସାଇବର ଥାନାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଧବାର ଉଦଘାଟନ କରିଛନ୍ତି। ଏହାଛଡା କମିଶନରେଟ ପୁଲିସ ଅଧୀନରେ ଥିବା ୩ଟି ଫାଣ୍ଡିକୁ ଥାନାର ମାନ୍ୟତା ଦିଆଯାଇ ବୁଧବାର ଲୋକାର୍ପିତ କରାଯାଇଛି। ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି, ସରକାର ଲୋକଙ୍କ ଜୀବନ, ସ୍ୱାଧୀନତା ଓ ସମ୍ପତ୍ତିକୁ ସାଇବର ଅପରାଧରୁ ସୁରକ୍ଷା ଦେବାକୁ ପ୍ରତିଶ୍ରୁତିବଦ୍ଧ। ଦିନକୁ ଦିନ ସାଇବର ଅପରାଧ ବଢ଼ିବା ସହ ସମାଜରେ ପ୍ରମୁଖ ଅପରାଧ ପାଲଟିଛି। ସାଇବର ଅପରାଧୀ ବିଦେଶରେ ବସି ଲୁଟ୍ କରୁଥିବା ବେଳେ ବାରମ୍ବାର ସର୍ଭରରେ ସ୍ଥାନ ବଦଳାଇ ପୁଲିସକୁ ଆହ୍ବାନ (ଚ୍ୟାଲେଞ୍ଜ) ଦେଉଛନ୍ତି। ଏହି ଅପରାଧ ଖାଲି ଜଣେ ବ୍ୟକ୍ତିକୁ ଆର୍ଥିକ କ୍ଷତି ପହଞ୍ଚାଇ ନ ଥାଏ ବରଂ ଦେଶର ଆର୍ଥିକ ଅବସ୍ଥାକୁ ଖରାପ ମଧ୍ୟ କରି ଦିଏ। ଉଦ୍‌ଘାଟିତ ସାଇବର ଥାନାରେ ତାଲିମପ୍ରାପ୍ତ ପୁଲିସ କର୍ମଚାରୀଙ୍କ ସହ ବୈଷୟିକ ବିେଶଷଜ୍ଞ ରହିବେ। ଆର୍ଥିକ ଓ ସାଇବର ଅପରାଧର ତଦନ୍ତ ପାଇଁ ସେମାନଙ୍କୁ ଉନ୍ନତମାନର ସାମଗ୍ରୀ ଯୋଗାଇ ଦିଆଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ କମିଶନରେଟ ପୁଲିସର ୩ଟି ଥାନାର ଉଦଘାଟନ କରିଛନ୍ତି। ଇନଫୋ ଭ୍ୟାଲି ସ୍ବତନ୍ତ୍ର ଆର୍ଥିକ ଜୋନ୍, କଟକ ବୟାଳିଶି ମୌଜା, ଭୁବନେଶ୍ୱର ପାହାଳ ଫାଣ୍ଡିକୁ ଥାନାରେ ରୂପାନ୍ତରୀକରଣ କରାଯାଇଛି। ଏସବୁ ଫାଣ୍ଡିକୁ ଥାନାରେ ପରିଣତ କରିବା ପାଇଁ ଦୀର୍ଘ ଦିନ ହେଲା ସ୍ଥାନୀୟ ଲୋକେ ଦାବି କରି ଆସୁଥିଲେ। ୩ଟି ନୂତନ ଥାନା େହବା ଫଳରେ ‌େ‌ଦ୍ବୖତ୍ୟ ନଗରୀରେ ପୁଲିସର ଶକ୍ତି ବୃଦ୍ଧି ପାଇବ।
ନୂଆ ଥାନା ସାଇବର ଓ ଆର୍ଥିକ ଅପରାଧୀଙ୍କୁ ଧରିବାରେ ସକ୍ଷମ ହେବ ବୋଲି ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର କହିଛନ୍ତି। ଆଭାସି ଜରିଆରେ ଆେୟାଜିତ ଉଦଘାଟନୀ ଉତ୍ସବରେ ପୁଲିସ ମହାନିର୍ଦେଶକ ଶ୍ରୀ ଅଭୟ ସ୍ୱାଗତ ଭାଷଣ ଦେଇଥିବା ବେଳେ ମହାନିରୀକ୍ଷକ (ଅପରେସନ୍) ଅମିତାଭ ଠାକୁର ଧନ୍ୟବାଦ ଅର୍ପଣ କରିଥିଲେ। ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ (୫ଟି) କାର୍ଯ୍ୟକ୍ରମ ପରିଚାଳନା କରିଥିଲେ। କାର୍ଯ୍ୟକ୍ରମରେ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଓ ଅନ୍ୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ।