ନୂଆଦିଲ୍ଳୀ: ଗତ ୪ ବର୍ଷ ମଧ୍ୟରେ ଭାରତରେ ମହିଳା ପାଇଲଟ୍ ସଂଖ୍ୟା ଦୁଇ ଗୁଣ ବୃଦ୍ଧି ପାଇ ୧୦୯୨ରେ ପହଞ୍ଚିଛି। ରାଷ୍ଟ୍ରାୟତ୍ତ ଉଦ୍ୟୋଗ ଏୟାର ଇଣ୍ଡିଆରେ ସର୍ବାଧିକ ମହିଳା ପାଇଲଟ ଅଛନ୍ତି। ଏୟାର ଇଣ୍ଡିଆର ମୋଟ ପାଇଲଟ୍ ସଂଖ୍ୟା ୮,୭୯୭ ଥିବା ବେଳେ ସେଥିମଧ୍ୟରୁ ୧୨.୪% ଅର୍ଥାତ୍ ୧,୦୯୨ ଜଣ ମହିଳା ପାଇଲଟ୍ ଅଛନ୍ତି।
୨୦୧୪ରେ ଭାରତର ମୋଟ ପାଇଲଟ୍ ସଂଖ୍୍ୟା ୫,୦୫୦ ଥିବା ବେଳେ ସେଥିମଧ୍ୟରୁ ମହିଳା ପାଇଲଟ୍ ସଂଖ୍ୟା ଥିଲା ୫୮୬। କିନ୍ତୁ ୪ ବର୍ଷ ମଧ୍ୟରେ ଏହି ସଂଖ୍ୟା ପାଖାପାଖି ଦୁଇ ଗୁଣା ବଢ଼ିଛି। କେବଳ ସେତିକି ନୁହେଁ ବିଶ୍ୱସ୍ତରରେ ମଧ୍ୟ ଭାରତୀୟ ମହିଳା ପାଇଲଟ୍ ସଂଖ୍ୟା ସର୍ବାଧିକ। ଆନ୍ତର୍ଜାତିକ ମହିଳା ପାଇଲଟ୍ ସୋସାଇଟିର ତଥ୍ୟାନୁଯାୟୀ ବିଶ୍ୱସ୍ତରରେ ମୋଟ ପାଇଲଟ୍ଙ୍କ ତୁଳନାରେ ମହିଳାଙ୍କ ସଂଖ୍ୟା ମାତ୍ର ୫% ଥିôବା ବେଳେ ଭାରତରେ ମହିଳା ପାଇଲଟ ସଂଖ୍ୟା ପ୍ରାୟ ଅଢ଼େଇଗୁଣ ଅଧିକ।
ଗତ ମାସରେ ମୁମ୍ବଇ ଏୟାରପୋର୍ଟରେ ଜଣେ ମହିଳା ପାଇଲଟ୍ ବିମାନ ଅବତରଣ କରିଥିଲେ। ଏହା ତାଙ୍କ ପାଇଁ ଯେତିକି ସ୍ମରଣୀୟ ଥିଲା ଭାରତୀୟ ବିମାନ ଚଳାଚଳ ଇତିହାସ ପାଇଁ ସେତିକି ଗୁରୁତ୍ୱପୂର୍ଣ୍ଣ ଥିଲା। ସେହି ବିମାନରେ ସମ୍ପୃକ୍ତ ମହିଳା ପାଇଲଟ୍ଙ୍କ ମା’ ପୂଜା ଚିଚାଙ୍କରଙ୍କ ଏୟାରହଷ୍ଟେସ୍ ଭାବେ ଚାକିରିର ଶେଷ ଦିନ ଥିଲା।
ପୂଜାଙ୍କ କହିବା ଅନୁଯାୟୀ ୧୯୮୦ରେ ସେ ଚାକରି ଆରମ୍ଭ କରିବା ବେଳେ ଭାରତରେ ମାତ୍ର ଦୁଇ ଜଣ ମହିଳା ପାଇଲଟ୍ ଥିଲେ। ସେଥିମଧ୍ୟରୁ ଜଣେ ଥିଲେ କମାଣ୍ଡର ସୌଦାମିନି ଦେଶମୁଖ। ତେଣୁ ସେ ତାଙ୍କ ଝିଅକୁ ପାଇଲଟ୍ କରିବା ପାଇଁ ଇଚ୍ଛା କରିଥିଲେ। ଆଉ ତାଙ୍କର ସେହି ସ୍ୱପ୍ନ ପୂରଣ ହୋଇଥିଲା। ତାଙ୍କ ଚାକିରିର ଶେଷ ଦିନ ସେ ତାଙ୍କ ଝିଅ ଚଲାଉଥିବା ବିମାନରେ ହିଁ କାଟିଥିଲେ।
