ପାଟନା : ବିହାର କିଶାନଗଞ୍ଜ ଜିଲାରେ ଏକ ଅଭାବନୀୟ ଘଟଣା ଘଟିଛି। ଏଠାରେ ଗଛରେ ବାନ୍ଧି ବାପା ଆଗରେ ଝିଅକୁ ଗଣବାଳାତ୍କାର କରାଯାଇଛି।
ପୁଲିସ୍ ଅଧିକାରୀଙ୍କ ସୂଚନା ଅନୁସାରେ କୋଡ଼ହୋୱାଡି ଥାନା ଅଞ୍ଚଳର ୧୯ ବର୍ଷିୟ ଯୁବତୀଙ୍କୁ ଗତ ମଙ୍ଗଳବାର ବିଳମ୍ବିତ ରାତିରେ ଗଣବଳାତ୍କାର କରାଯାଇଛି। ଏନେଇ ବୁଧବାର ଯୁବତୀ ଜଣକ ଥାନାରେ ଅଭିଯୋଗ କରିଛନ୍ତି। ଯୁବତୀଙ୍କ ଅଭିଯୋଗ ଅନୁଯାୟୀ ତାଙ୍କ ଗ୍ରାମର ୬ ଜଣ ଯୁବକ ଗୁରୁବାର ରାତିରେ ତାଙ୍କ ଘର କବାଟ ଠକ୍ ଠକ୍ କରି ପିଇବାକୁ ପାଣି ମାଗିଥିଲେ। ତାଙ୍କ ବାପା କବାଟ ଖୋଲିବା ମାତ୍ରେ ସେମାନେ ଘରକୁ ବଳପୂର୍ବକ ପଶିଯାଇ ତାଙ୍କୁ ବାହାରକୁ ଟାଣି ଆଣିଥିଲେ। ଘର ବାହାରେ ଏକ ଗଛରେ ତାଙ୍କ ବାପାକୁ ବାନ୍ଧି ଦେଇ ତାଙ୍କୁ ଜଣକ ପରେ ଜଣେ ବଳାତ୍କାର କରିଥିଲେ। ପୁଲିସ୍କୁ କହିଲେ ବାପା, ଝିଅଙ୍କୁ ଜୀବନରୁ ମାରିଦେବାକୁ ଯୁବକମାନେ ଧମକ ଦେଇଛନ୍ତି। ହେଲେ ଯୁବତୀ ଜଣକ ଥାନାରେ ପହଞ୍ଚି ଅଭିଯୋଗ କରିଛନ୍ତି। ଅଭିଯୋଗ ଆଧାରରେ ପୁଲିସ୍ ମାମଲା ରୁଜୁ କରି ତଦନ୍ତ ଚଳାଇଛି। ତେବେ ଅଭିଯୁକ୍ତମାନେ ଫେରାର ଥିବାରୁ ସେମାନଙ୍କୁ ଗିରଫ କରାଯାଇ ପାରିନାହିଁ ବୋଲି କିଶାନଗଞ୍ଜ ଏସ୍ପି କହିଛନ୍ତି।
