ନୂଆଦିଲ୍ଲୀ: କରୋନା ମୃତ୍ୟୁ ହାରରେ ଇଟାଲୀ ଏବେ ଶୀର୍ଷରେ । ଏହି ଦେଶରେ ଯେତେ ଲୋକ କରୋନା ସଂକ୍ରମିତ ହୋଇଛନ୍ତି ସେମାନଙ୍କ ମଧ୍ୟରୁ ୧୨.୩% ମୃତ୍ୟୁବରଣ କରିଛନ୍ତି । ଅନ୍ୟପକ୍ଷରେ ଫ୍ରାନ୍ସରେ କରୋନା ସଂକ୍ରମିତଙ୍କ ମଧ୍ୟରୁ ୧୦% ମୃତ୍ୟୁବରଣ କରିଥିବା ରିପୋର୍ଟ ମିଳିଛି । ତେବେ ଆଶ୍ବାସନାର ବିଷୟ ହେଉଛି ଭାରତରେ ଏହି ସଂଖ୍ୟ ଅନ୍ୟ ଦେଶ ତୁଳନାରେ ଢ଼େର ନଗଣ୍ୟ । କରୋନାରେ ଭାରତରେ ଆକ୍ରାନ୍ତଙ୍କ ମଧ୍ୟରୁ ମାତ୍ର ୨.୮% ମୃତ୍ୟୁ ବରଣ କରିଥିବା ସୂଚନା ରହିଛି ।
ଆମେରିକାର ଜନ୍ ହପକିନ୍ସ ବିଶ୍ବବିଦ୍ୟାଳୟ କରୋନା ଭୂତାଣୁ ରିସୋର୍ସ ସେଣ୍ଟର ପକ୍ଷରୁ ପ୍ରକାଶିତ ରିପୋର୍ଟ ଅନୁସାରେ ଇଟାଲୀରେ ୪ ଏପ୍ରିଲ ସୁଦ୍ଧା ସଂକ୍ରମିତ ୧୧୯୮୨୭ ଲୋକଙ୍କ ମଧ୍ୟରୁ ୧୪୬୮୧ (୧୨.୩%) ମୃତ୍ୟୁବରଣ କରିଛନ୍ତି । ଫ୍ରାନ୍ସରେ ୬୫୨୦୩ ରୋଗୀଙ୍କ ମଧ୍ୟରୁ ୬୫୨୦ (୧୦% ) ମୃତ୍ୟୁବରଣ କରିଥିବାବେଳେ ସ୍ପେନରେ ୧୧୯୧୯୯ ରୋଗୀଙ୍କ ମଧ୍ୟରୁ ୧୧୧୯୮ (୯.୪%), ବ୍ରିଟେନରେ ୩୮୬୮୯ ସଂକ୍ରମିତଙ୍କ ମଧ୍ୟରୁ ୩୬୧୧ ଜୀବନ ହରାଇଛନ୍ତି। ଏ କ୍ଷେତ୍ରରେ ଭାରତର ସ୍ଥିତି ଯଥେଷ୍ଟ ଭଲ । ଏହି ଦେଶରେ ୨୯୦୨ ଜଣ ସଂକ୍ରମିତଙ୍କ ମଧ୍ୟରୁ ୬୮ ଜଣ ମୃତ୍ୟୁବରଣ କରିଥିବା ରିପୋର୍ଟ ମିଳିଛି । ଅନ୍ୟପକ୍ଷରେ ୧୮୪ ଜଣ ସଂକ୍ରମିତ ସୁସ୍ଥ ହୋଇଥିବା ଜଣାପଡ଼ିଛି ବୋଲି ରିପୋର୍ଟରେ କୁହାଯାଇଛି ।
