ଡେସ୍କ : ଭାରତୀୟ ରେଡକ୍ରସ ସୋସାଇଟି, ଓଡ଼ିଶା ରାଜ୍ୟ ଶାଖା କଟକର ‘ସହାୟ’ ମାନସିକ ଅନଗ୍ରସର ପିଲାଙ୍କ ସ୍ୱତନ୍ତ୍ର ବିଦ୍ୟାଳୟଠାରେ ’ ବିଶ୍ୱ ବୃତିଗତ ଚିକିତ୍ସା ଦିବସ ବା ୱାର୍ଲଡ୍ ଅକୁପେସନାଲ୍ ଥେରାପି ଡେ’ ଉପଲକ୍ଷେ ଚଳିତ ଶୁକ୍ରବାର ଏକ ସଚେତନ ସଭା ଅନୁଷ୍ଠିତ ହୋଇଯାଇଛି । ଏହି ସଭାରେ ସ୍ୱାମୀ ବିବେକାନନ୍ଦ ଜାତୀୟ ଥଇଥାନ ତାଲିମ୍ ଓ ଗବେଷଣା ଅନୁଷ୍ଠାନ (ଏସ୍.ଭି.ନିରତାର୍) କଟକରୁ ବରିଷ୍ଠ ଅକୁପେସନାଲ୍ ଥେରାପିଷ୍ଟ୍ ସୁବ୍ରତୋ ହାଲଦର ମୁଖ୍ୟବକ୍ତାଭାବେ ଯୋଗ ଦେଇ ବୃତିଗତ ଚିକିତ୍ସାର ସଂଜ୍ଞା, କାରଣ ଓ ନିରାକରଣ ଉପରେ ବିସ୍ତୃତ ଭାବରେ ଆଲୋଚନା କରିଥିଲେ।
ବିଶ୍ୱ ବୃତିଗତ ଚିକିତ୍ସା ଦିବସ ଉପଲକ୍ଷେ ଚଳିତ ବର୍ଷର ବାର୍ତ୍ତା ‘ଗୋଷ୍ଠୀ ଦ୍ୱାରା ଏକତା’ର ଲକ୍ଷ୍ୟ ଉପରେ ଆଲୋଚନା କରାଯାଇଥିଲା। ଏହି ସଭାରେ କଟକ ସହରର ବିଭିନ୍ନ ଦିବ୍ୟାଙ୍ଗ ପିଲାଙ୍କର ଅଭିଭାବକମାନେ ଅଂଶ ଗ୍ରହଣ କରିଥିଲେ।
ଏହି ସଭା ଭାରତୀୟ ରେଡ଼କ୍ରସ ସୋସାଇଟି, ଓଡ଼ିଶା ରାଜ୍ୟ ଶାଖାଦ୍ୱାରା ପରିଚାଳିତ କଟକସ୍ଥିତ ସହାୟ, ମାନସିକ ଅନଗ୍ରସର ପିଲାଙ୍କ ସ୍ୱତନ୍ତ୍ର ବିଦ୍ୟାଳୟର ଅବୈତନିକ ସଚିବ ମୃଣାଳିନୀ ପାଢ଼ୀଙ୍କ ପରିଚାଳନାରେ ହୋଇଥିଲା।
