ଭୁବନେଶ୍ୱର : ଚକ୍ ଦେ ଇଣ୍ଡିଆ…. ଚକ୍ ଦେ ଇଣ୍ଡିଆ ଗୀତରେ କମ୍ପିଲା କଳିଙ୍ଗ ଷ୍ଟାଡ଼ିୟମ। ବଲିଉଡ୍ ଓ ଓଲିଉଡ୍ କଳାକାରଙ୍କ ସଙ୍ଗୀତର ତାଳେତାଳେ ଉନ୍ମୋଚିତ ହୋଇଯାଇଛି ଚତୁର୍ଦଶତମ ପୁରୁଷ ହକି ବିଶ୍ୱକପ ଟ୍ରଫି। ସୋମବାର ସନ୍ଧ୍ୟାରେ କଳିଙ୍ଗ ଷ୍ଟାଡ଼ିୟମରେ ଅନୁଷ୍ଠିତ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମ ମାଧ୍ୟମରେ ହକି ବିଶ୍ୱକପ ଟ୍ରଫି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଅନ୍ତର୍ଜାତୀୟ ହକି ମହାସଂଘର ସଭାପତି ନରିନ୍ଦର ବାତ୍ରାଙ୍କ ଦ୍ୱାରା ଉନ୍ମୋଚିତ ହୋଇଯାଇଛି। ଏହି ଅବସରରେ ହକି ବିଶ୍ୱକପକୁ ଅଧିକରୁ ଅଧିକ ଲୋକପ୍ରିୟତା କରିବା ଲାଗି ରାଜ୍ୟ ସରକାରଙ୍କ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ହକିକୁ ନେଇ ନିର୍ମିତ ହୋଇଥିବା ଚକ୍ ଦେ ଇଣ୍ଡିଆ ଚଳଚିତ୍ରର ଟାଇଟଲ ସଙ୍ଗୀତ ସୁଖିନ୍ଦର ସିଂହ ଓ ତାଙ୍କ ଟିମ୍ ପରିବେଷଣ କରିଥିଲେ। ସୁଖବିନ୍ଦରଙ୍କ ସଙ୍ଗୀତ ହକି ବିଶ୍ୱକପ ପୂର୍ବରୁ ଭାରତୀୟ ଖେଳାଳି ଓ ହକିପ୍ରେମୀଙ୍କୁ ବେଶ ଉତ୍ସାହିତ କରିଛି।
