ପାଟଣା : କେନ୍ଦୁଝର ଜିଲା ପାଟଣା ବିଭାଗ ପକ୍ଷରୁ ଗୁରୁବାର ଏକ ଚୋରା କାଠ ବୋଝେଇ ପିକ୍ଅପ୍ ଭ୍ୟାନକୁ ପୋଇପାଣି ନିକଟରୁ ଗୋଡାଇ ଗୋଡାଇ ୨୦ନମ୍ବର ରାଜପଥ ପିପିଳିଆ ଛକ ନିକଟରେ ଜବତ କରିଛି ପାଟଣା ବନ ବିଭାଗ। ଏକ ପିକ୍ଅପ୍ ଭ୍ୟାନରେ ଚୋରା କାଠ ନେଇ ଯାଉଥିବା ଖବର ପାଇ ପାଟଣା ରେଞ୍ଜର ପବିତ୍ର ମୋହନ ନାଏକଙ୍କ ନେତୃତ୍ୱରେ ମୋବାଇଲ ସ୍କ୍ବାଡ୍, ଏଲିଫ୍ୟାଣ୍ଟ ସ୍କ୍ବାଡ୍ ମିଳିତ ଭାବେ ପୋଇପାଣି ନିକଟରୁ ଗାଡିକୁ ପିଛା କରିଥିଲା। ପିପିଳିଆ ଛକ ନିକଟରେ ପାଖାପାଖି ରାତି ୨ଟା ସମୟରେ ଚୋରା କାଠ ଥିବା ଗାଡ଼ିଟିକୁ ଅଟକାଇବା ପାଇଁ ଚେଷ୍ଟା କରୁଥିବା ବେଳେ ବନ ବିଭାଗ ଗାଡିକୁ ଧକ୍କା ଦେଇ ଖସି ଯିବାକୁ ଚେଷ୍ଟା କରୁଥିଲେ ମଧ୍ୟ ବନ ବିଭାଗ କବଳରୁ ଯାଇ ନପାରି ଅନ୍ଧକାର ସୁଯୋଗରେ କାଠ ମାଫିଆ ମାନେ ଗାଡି ଛାଡି ଘଟଣା ସ୍ଥଳରୁ ଖସି ପଳାଇ ଯାଇଥିଲେ। ଏହି ଚଢ଼ାଉରେ ପାଟଣା ରେଞ୍ଜର ପବିତ୍ର ମୋହନ ନାଏକ , ବନପାଳ ସନ୍ତୋଷ କୁମାର ପୋହି, ଆଶୁତୋଷ ଚକ୍ରବର୍ତ୍ତୀ , ଆଲମଣୀ ନାଏକ , ପାରା ସ୍କ୍ବାଡ୍ ଓ ଏଲିଫ୍ୟାଣ୍ଟ ସ୍କ୍ବାଡ୍ ସାମିଲ ହୋଇଥିଲେ। ଜବତ ପିକ୍ଅପ୍ ଭ୍ୟାନଟିକୁ ପାଟଣା ରେଞ୍ଜ ଅଫିସ ଅଣାଯାଇଥିବା ବେଳେ ଜବତ କାଠର ଆନୁମାନିକ ମୂଲ୍ୟ ୧ଲକ୍ଷ ଟଙ୍କା ହେବ ବୋଲି ରେଞ୍ଜର ପବିତ୍ର ମୋହନ ନାଏକ ସୂଚନା ଦେଇଛନ୍ତି।
Comments are closed.