ପ୍ରଭିଡେନ୍ସ : ଭାରତ ୨୦୧୮ ମହିଳା ଟ୍ୱେଣ୍ଟି-୨୦ ବିଶ୍ୱକପ୍ର ସେମିଫାଇନାଲରେ ପ୍ରବେଶ କରିଛି । ଗୁରୁବାର ଗ୍ରୁପ୍ ‘ବି’ର ୩ୟ ମ୍ୟାଚରେ ଆୟରଲାଣ୍ଡକୁ ସହଜରେ ୫୨ ରନରେ ହରାଇ ଭାରତ ଏହି କୃତିତ୍ୱ ହାସଲ କରିଛି । ଗ୍ରୁପ୍ ‘ବି’ରେ ଭାରତ ତା’ର ୩ଟିଯାକ ମ୍ୟାଚ୍ ଜିତି ଅଷ୍ଟ୍ରେଲିଆ ସହ ସେମିଫାଇନାଲ ଖେଳିବାକୁ ଯୋଗ୍ୟତା ଅର୍ଜନ କରିଛି । ୧୭ରେ ଅଷ୍ଟ୍ରେଲିଆ-ଭାରତ ଶେଷ ଲିଗ୍ ମ୍ୟାଚ୍ ଖେଳାଯିବ। ମିତାଲି ରାଜ୍ଙ୍କ ଅର୍ଦ୍ଧଶତକ ବଳରେ ପ୍ରଥମେ ବ୍ୟାଟିଂକରି ଭାରତ ୬ ୱିକେଟରେ ୧୫୬ ରନ୍ କରିଥିଲା। ପରେ ବାମହାତି ସ୍ପିନର ରାଧା ଯାଦବ ହ୍ୟାଟ୍ରିକ୍ ନେବାରୁ ଆୟରଲାଣ୍ଡ ୮ ୱିକେଟ ହରାଇ ୯୩ ରନ୍ କରି ପାରିଥିଲା।
ଆୟରଲାଣ୍ଡ ଟସ୍ ଜିତି ଫିଲ୍ଡିଂ ନେଇଥିଲା। ଭାରତ ଓପ୍ନିଂ ଯୋଡ଼ିରେ ୧୦ ଓଭରରେ ୬୭ ରନ୍ କରିଥିଲା। ସ୍ମୃତି ମାନ୍ଧାନା ୨୯ ବଲ୍ରୁ ଗୋଟିଏ ଛକା ଓ ୪ଟି ଚୌକା ସହ ୩୩ ରନ୍କରି ଆଉଟ ହୋଇଥିଲେ। ପରେ ଜେମିମା ରଡ୍ରିଗ୍ୱେଜ୍ ୧୧ ବଲ୍ରୁ ୩ଟି ଚୌକା ସହ ୧୮, ଅଧିନାୟିକା ହରମନପ୍ରୀତ କୌର ୭, ବେଦା କୃଷ୍ଣମୂର୍ତ୍ତି ୯ ଓ ଦୀପ୍ତି ଶର୍ମା ଅପରାଜିତ ୧୧ ରନ୍ କରିଥିଲେ। କ୍ରମାଗତ ୨ୟ ମ୍ୟାଚ୍ରେ ଅର୍ଦ୍ଧଶତକ ମାରିବା ସହ ପ୍ଲେୟର ଅଫ୍ ଦି ମ୍ୟାଚ୍ ହୋଇଥିବା ମିତାଲି ରାଜ୍ ୫୬ ବଲ୍ରୁ ଗୋଟିଏ ଛକା ଓ ୪ଟି ଚୌକା ସହ ୫୧ ରନ୍ କରିଥିଲେ। ଆୟରଲାଣ୍ଡର କିମ୍ ଗାର୍ଥ ୨ଟି ୱିକେଟ ପାଇଥିଲେ। ୧୪୬ ରନ୍ ଲକ୍ଷ୍ୟରେ ଆୟରଲାଣ୍ଡ ସହଳ ଗୋଟିଏ ୱିକେଟ ହରାଇଥିବା ବେଳେ ଓପ୍ନର କ୍ଲେୟାର ସିଲିଂଟନ ୨୩ ଓ ଇସୋବେଲ୍ ଜଏସ୍ ୪ଟି ଚୌକା ସହ ୩୩ ରନ୍ କରିଥିଲେ। ୧୯ତମ ଓଭରର ଶେଷ ୩ଟି ବଲ୍ରେ ରାଧା ଯାଦବ କ୍ରମାଗତ ୩ଟି ୱିକେଟ ନେଇ ହ୍ୟାଟ୍ରିକ୍ ପୂରଣ କରିଥିଲେ। ଦୀପ୍ତି ଶର୍ମା ୨ଟି ୱିକେଟ ପାଇଥିଲେ।