ଭୁବନେଶ୍ବର: ରାଜ୍ୟରେ ମହିଳା ନିର୍ଯାତନା ଅଭିଯୋଗ ବଢ଼ିବାରେ ଲାଗିଛି। ଗତ ଦୁଇ ମାସରେ ଖୋର୍ଦ୍ଧା, ଭୁବନେଶ୍ବର, କଟକ, ଗଞ୍ଜାମ, ପୁରୀ, ଯାଜପୁର ଓ କେନ୍ଦ୍ରାପଡ଼ା ଜିଲାରେ ସର୍ବାଧିକ ମହିଳା ନିର୍ଯାତନା ମାମଲା ପଞ୍ଜିକୃତ ହୋଇଛି। ପୂର୍ବରୁ ପ୍ରତିମାସରେ ୧୦୦ରୁ ୧୭୦ ମାମଲା ପଞ୍ଜିକୃତ ହେଉଥିବା ବେଳେ ଏବେ ମାସକୁ ଅତିକମରେ ୨୭୦ରୁ ୨୮୦ଟି ମାମଲା ପଞ୍ଜିକୃତ ହେଉଛି। ଆଗରୁ ମାସକୁ ୭୦ରୁ ୮୦ଟି ମାମଲା ସମାଧାନ ହେଉଥିବା ବେଳେ ଏବେ ମାସକୁ ସର୍ବାଧିକ ୧୧୫ଟି ମାମଲା ସମାଧାନ କରାଯାଉଛି। ପୂର୍ବରୁ ପ୍ରାୟ ୩୨୦୦ଟି ମାମଲା ବିଚାରାଧୀନ ପ୍ରକ୍ରିୟାରେ ଅଟକିଛି। ମାସକୁ ମାସ ଅଭିଯୋଗ ସଂଖ୍ୟା ବଢ଼ୁଛି।
ଏନେଇ ରାଜ୍ୟ ସରକାରଙ୍କ ପକ୍ଷରୁ ମହିଳା ଆୟୋଗରେ ଜଣେ ବିଚାରପତି ନିଯୁକ୍ତି ହେବା ନେଇ ପ୍ରକ୍ରିୟା ଆରମ୍ଭ ହୋଇଥିବା ଜଣାପଡ଼ିଛି। ଅଗଷ୍ଟ ୧୧ରେ ରାଜ୍ୟ ମହିଳା ଆୟୋଗ ଅଧ୍ୟକ୍ଷା ଭାବେ ଶୋଭନା ମହାନ୍ତିଙ୍କ ସମେତ ୪ ଜଣ ସଦସ୍ୟା ଦାୟିତ୍ବ ଗ୍ରହଣ କରିବା ପରେ କ୍ଷେତ୍ରସ୍ତରରେ ମାମଲାର ତଦନ୍ତ କରି ସମାଧାନ କରିବାକୁ ଗୁରୁତ୍ବ ଦିଆଯାଇଛି। ପୂର୍ବରୁ ଜିଲା ଶିବିର ଅଦାଲତ ବନ୍ଦ ହୋଇଥିବା ବେଳେ ଏବେ ତାହାକୁ କାର୍ଯ୍ୟକ୍ଷମ କରାଯାଇଛି। ଏଣିକି ଅଭିଯୋଗକାରୀଙ୍କୁ ଆୟୋଗ କାର୍ଯ୍ୟାଳୟକୁ ବାରମ୍ବାର ଦୌଡ଼ିବାକୁ ପଡ଼ିବନି। ଅଧ୍ୟକ୍ଷାଙ୍କ ସମେତ ସଦସ୍ୟା, ଜିଲାପାଳ, ଜିଲା ସାମାଜିକ ମଙ୍ଗଳ ଅଧିକାରୀ, ଜିଲା ଆରକ୍ଷୀ ଅଧୀକ୍ଷକଙ୍କୁ ନେଇ ଜିଲାସ୍ତରରେ ଆସୁଥିବା ଅଭିଯୋଗ ଜିଲା ଅଦାଲତ ଶିବିରରେ ସମାଧାନ କରାଯାଉଛି।
ଏବେସୁଦ୍ଧା ବାଲେଶ୍ବର, କେନ୍ଦ୍ରାପଡ଼ା, ଜଗତସିଂହପୁର, ନୟାଗଡ଼ ଜିଲାରେ ଜିଲା ଅଦାଲତ ଶିବିର ହୋଇ ବହୁ ମାମଲାର ସମାଧାନ ହୋଇପାରିଛି। ଚଳିତ ମାସ ୨୯ରେ ଅନୁଗୋଳ ଓ େଢଙ୍କାନାଳ, ନଭେମ୍ବର ୨୬ରେ ଗଞ୍ଜାମ ଓ ଗଜପତି ଓ ପରବର୍ତ୍ତୀ ସମୟରେ କୋରାପୁଟ ଜିଲାରେ ରାୟଗଡ଼ା, ମାଲକାନଗିରି ଓ ନବରଙ୍ଗପୁର ଜିଲାର ଅଭିଯୋଗ ଜିଲା ଅଦାଲତ ଶିବିରରେ ତଦନ୍ତ କରି ସମାଧାନ କରିବାକୁ ଗୁରୁତ୍ବ ଦିଆଯାଉଛି। ଏସମ୍ପର୍କରେ ମହିଳା ଆୟୋଗ ସଦସ୍ୟା ଊର୍ମିିଳା ମହାପାତ୍ର କୁହନ୍ତି, ମହିଳା ଆୟୋଗ ସଦସ୍ୟାଭାବେ ଦାୟିତ୍ବ ନେବା ପରେ କୌଣସି ଅଭିଯୋଗର ବାଛବିଚାର ନକରି ସବୁ ଅଭିଯୋଗକୁ ଗୁରୁତ୍ବ ଦିଆଯାଉଛି। କ୍ଷେତ୍ରସ୍ତରରୁ ତଦନ୍ତ କରି କେଉଁଠି ସମସ୍ୟା ରହିଛି ତାହାକୁ ଅନୁଧ୍ୟାନ କରି ପରିବାରକୁ ସଜାଡ଼ି ସୁନ୍ଦର ସଂସାର ଗଢ଼ିବା ଲାଗି ପ୍ରୟାସ କରାଯାଉଛି। ସର୍ବାଧିକ ଅଭିଯୋଗର ତଦନ୍ତ ଓ ସମାଧାନ ଦିଗରେ କାର୍ଯ୍ୟ କରାଯାଉଛି।
