ସମାଜ ଡିଜିଟାଲ ଡେସ୍କ: ଭାରତର ବିଶିଷ୍ଟ ଉଦ୍ୟୋଗବିତ୍ ତଥା ଶିଳ୍ପପତି ରତନ ଟାଟାଙ୍କ ମୃତ୍ୟୁ ପରେ ଦେଶ ବିଦେଶର ବିଶିଷ୍ଟ ବ୍ୟକ୍ତିମାନେ ଶ୍ରଦ୍ଧାଞ୍ଜଳି ଜଣାଉଛନ୍ତି। ସାମାଜିକ ଗଣମାଧ୍ୟମରେ ରତନ ଟାଟାଙ୍କ ଦୟାଳୁ ଏବଂ ଉଦାରବାଦୀ ସ୍ଵଭାବର ଚର୍ଚ୍ଚା ହେଉଛି। ଏହା ମଧ୍ୟରେ ଟାଟା ପରିବାରର ଜଣେ ସଦସ୍ୟଙ୍କୁ ନେଇ ବି ଚର୍ଚ୍ଚା ଚାଲିଛି। ସେ ହେଉଛନ୍ତି ନୋଏଲ ଟାଟା। ଟାଟା ପରିବାରର କଥା ଉଠିଲେ ରତନ ଟାଟାଙ୍କ ପରେ ନୋଏଲ ଟାଟାଙ୍କ ନାଁ ଆସେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରତନ ଟାଟାଙ୍କ ନିଧନ ପରେ ନୋଏଲ ଟାଟାଙ୍କ ସହିତ କଥା ହେବା ସହିତ ସମବେଦନା ଜଣାଇଛନ୍ତି। ତେବେ ଆସନ୍ତୁ ଜାଣିବା ଏହି ନୋଏଲ ଟାଟା କିଏ ଏବଂ ରତନ ଟାଟାଙ୍କା ସହିତ ତାଙ୍କର ସମ୍ପର୍କ କ’ଣ ?
ନୋଏଲ ଟାଟା ହେଉଛନ୍ତି ରତନ ଟାଟାଙ୍କ ଭାଇ(ସାବତ ଭାଇ)। ରତନ ଟାଟାଙ୍କ ବାପା ନଭଲ ଟାଟା ୨ଟି ବିବାହ କରିଥିଲେ। ନଭଲ ଟାଟା ସୁନୀ କମିଶ୍ରିଏଟଙ୍କୁ ପ୍ରଥମ ବିବାହ କରିଥିଲେ। ଯାହାଙ୍କର ୨ଟି ସନ୍ତାନ ଥିଲେ, ରତନ ଟାଟା ଏବଂ ଜିମି ଟାଟା। ରତନ ଏବଂ ଜିମି ବିବାହ କରିନାହାନ୍ତି। ନଭଲ ଟାଟା ସ୍ତ୍ରୀଙ୍କଠାରୁ ଅଲଗା ହେବା ପରେ ୧୯୫୫ରେ ସ୍ଵିଜରଲାଣ୍ଡର ବ୍ୟବସାୟୀ ସିମୋନଙ୍କୁ ବିବାହ କରିଥିଲେ। ନଭଲ ଏବଂ ସିମୋନଙ୍କ ପୁଅ ହେଉଛନ୍ତି ନୋଏଲ ଟାଟା।
ନୋଏଲ ଟାଟା ବର୍ତ୍ତମାନ ସାର୍ ରତନ ଟାଟା ଟ୍ରଷ୍ଟ ଏବଂ ସାର ଦୋରାବଜୀ ଟାଟା ଟ୍ରଷ୍ଟ ବୋର୍ଡର ଟ୍ରଷ୍ଟି। ସେ ଟାଟା ଇଣ୍ଟର ନ୍ୟାସନାଲ ଲିମିଟେଡ୍, ଭୋଲଟାସ୍ ଲିମିଟେଡ୍, ଟାଟା ଇନଭେଷ୍ଟମେଣ୍ଟ କର୍ପୋରେସନ ଲିମିଟେଡର ଅଧ୍ୟକ୍ଷ ଅଛନ୍ତି ଏବଂ ଟାଇଟନ କମ୍ପାନୀର ଉପାଧ୍ୟକ୍ଷ ମଧ୍ୟ। ରତନ ଟାଟାଙ୍କ ନିଧନ ପରେ ସେ ଟାଟା ପରିବାରର ମଙ୍ଗ ଧରିବା ନେଇ ଚର୍ଚ୍ଚା ଜୋର ଧରିଛି।
