ୱାଶିଂଟନ : ବୈଶ୍ବିକ ମହାମାରୀ କରୋନା ଭୂତାଣୁର ବୃଦ୍ଧି ପାଉଥିବା ସଂକ୍ରମଣ ମଧ୍ୟରେ ବିଶ୍ୱ ସ୍ୱାସ୍ଥ୍ୟ ସଂଗଠନ ‘ହୁ’ ଫାଇଜର ଏବଂ ବାଇନୋଟେକର କରୋନା ଟିକାକୁ ଜରୁରୀକାଳୀନ ବ୍ୟବହାର କରିବାକୁ ଅନୁମତି ଦେଇଛି। ବିଶ୍ବ ସ୍ୱାସ୍ଥ୍ୟ ସଂଗଠନ ଦ୍ୱାରା ପ୍ରଥମ ଥର ପାଇଁ କୌଣସି ଏକ ଟିକାକୁ ମାନ୍ୟତା ଦେଇଛି । ଏହା ସହିତ ବିଶ୍ୱର ବିଭିନ୍ନ ଦେଶରେ ଫାଇଜରର କରୋନା ଟୀକା ବ୍ୟବହାର ପାଇଁ ପଥ ପରିସ୍କାର ହୋଇଛି । ଅନ୍ୟ ପକ୍ଷରେ ଭାରତ କରୋନା ଭୂତାଣୁ ଟିକାର ଜରୁରୀକାଳୀନ ବ୍ୟବହାର ନେଇ ଭାରତ ମଧ୍ୟ ଆଜି ଏକ ବଡ ନିଷ୍ପତ୍ତି ନେବ।
ବିଶ୍ୱ ସ୍ୱାସ୍ଥ୍ୟ ସଂଗଠନ ‘ହୁ’ ଏହାର ବିବୃତ୍ତିରେ କହିଛି ଯେ କରୋନା ମହାମାରୀ ପରେ ଜରୁରୀକାଳୀନ ବ୍ୟବହାର କରିବାକୁ ସଂଗଠନ ଅନୁମତି ଦେଇଥିବା ଫାଇଜର-ବାୟୋଟେକ୍ ଟିକା ହେଉଛି ପ୍ରଥମ ଟିକା। ‘ହୁ’ର ସହକାରୀ ନିର୍ଦ୍ଦେଶକ ମାରିଆଙ୍ଗେଲା ସିମାଓ କହିଛନ୍ତି ଯେ କରୋନା ଭୂତାଣୁ ଟୀକାକରଣର ବିଶ୍ବ ସ୍ତରରେ ପହଞ୍ଚିବା ନିଶ୍ଚିତ କରିବା ଦିଗରେ ଏହା ଏକ ସକରାତ୍ମକ ପଦକ୍ଷେପ।
ବିଶ୍ୱ ସ୍ୱାସ୍ଥ୍ୟ ସଂଗଠନ ‘ହୁ’ ସମ୍ପୂର୍ଣ୍ଣ ଏବଂ ବିସ୍ତୃତ ଗବେଷଣା କରିବା ପରେ କରୋନା ଟିକାକୁ ଅନୁମୋଦନ ଦେବ। ଫାଇଜର ଟିକା ପାଇଁ ‘ହୁ’ ସବୁଜ ସଙ୍କେତ ଦେବା ଅର୍ଥ ହେଉଛି ବର୍ତ୍ତମାନ ଗରିବ ଦେଶଗୁଡିକୁ ଶୀଘ୍ର ୟୁରୋପ ଏବଂ ଉତ୍ତର ଆମେରିକାରେ ପୂର୍ବରୁ ଉପଲବ୍ଧ କରୋନା ଟିକା ମିଳି ପାରିବ। ପ୍ରତ୍ୟେକ ଦେଶରେ ନିଜସ୍ୱ ଔଷଧ ନିୟାମକ ସଂସ୍ଥା ଅଛି, ଯାହା କୌଣସି ପ୍ରକାର କରୋନା ଟିକା ପାଇଁ ଅନୁମୋଦନ ଦେବା ପରେ ହିଁ ଏହାକୁ ବ୍ୟବହାର କରାଯିବ। କିନ୍ତୁ କେତେକ ଦୁର୍ବଳ ତଥା ଗରିବ ଦେଶ ସାଧାରଣତଃ ଟିକା ପରୀକ୍ଷା ପାଇଁ ବିଶ୍ୱ ସ୍ୱାସ୍ଥ୍ୟ ସଂଗଠନ ଉପରେ ନିର୍ଭର କରନ୍ତି।
