ଭୁବନେଶ୍ୱର: ରାଜ୍ୟରେ ସ୍ବାଭାବିକ ଠାରୁ ହୋଇଛି ଅଧିକ ବର୍ଷା । ଜୁନରୁ ବର୍ତ୍ତମାନ ସୁଦ୍ଧା ୧୫ ପ୍ରତିଶତ ଅଧିକ ବର୍ଷା ହୋଇଥିବା ନେଇ ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ଏଥି ସହିତ ସୂଚନା ଅନୁଯାୟୀ ବୌଦ୍ଧ ଓ କନ୍ଧମାଳ ଜିଲ୍ଲା ସମେତ ୧୦ ଜିଲ୍ଲାରେ ପ୍ରବଳ ବର୍ଷା ହୋଇଥିବା କୁହାଯାଇଛି । ଅନ୍ୟ ୨୦ଟି ଜିଲ୍ଲାରେ ସ୍ୱାଭାବିକ ବର୍ଷା ହୋଇଥିବା ନେଇ ସୂଚନା ରହିଛି । ଦେବଗଡ଼ରେ ଅଧିକ ୪୦%, ଢେଙ୍କାନାଳରେ ଅଧିକ ୨୯%, ଜଗତସିଂହପୁରରେ ଅଧିକ ୨୧%, ନୟାଗଡରେ ଅଧିକ ୨୨%, ନୂଆପଡାରେ ଅଧିକ ୨୦% ବର୍ଷା ହୋଇଛି । ସେହିପରି କୋରାପୁଟରେ ଅଧିକ ୩୦%, ରାୟଗଡାରେ ଅଧିକ ୩୩%, ଏବଂ ଗଜପତିରେ ଅଧିକ ୨୦%ରେ ସ୍ୱାଭାବିକ ଠାରୁ ଅଧିକ ବର୍ଷା ରେକର୍ଡ ହୋଇଛି । ଅନ୍ୟପଟେ ୧ ଜୁନ ୨୦୨୨ରୁ ୨୧ ଅଗଷ୍ଟ ୨୦୨୨ ମଧ୍ୟରେ ରାଜ୍ୟରେ ୯୩୪.୨ ମିମି ବର୍ଷା ରେକର୍ଡ କରାଯାଇଛି । ଯାହାକି ଏହି ସମୟର ସ୍ୱାଭାବିକ ବର୍ଷା ୮୧୧.୯ ମିମି ତୁଳନାରେ ୧୫% ଅଧିକ ରହିଛି ବୋଲି କହିଛି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର । ସବୁଠାରୁ ବଡ଼ କଥା ହେଉଛି ଏହି ସମୟ ମଧ୍ୟରେ ବୌଦ୍ଧରେ ୬୨% ଅଧିକ ବର୍ଷା ହୋଇଥିବା ବେଳେ କନ୍ଧମାଳରେ ୭୩%ରେ ସ୍ୱାଭାବିକ ଠାରୁ ଅତ୍ୟଧିକ ବର୍ଷା ରେକର୍ଡ ହୋଇଛି ।
Comments are closed.