ପଞ୍ଜଶିରରେ ତାଲିବାନ ସହିତ ଚାଲିଛି ମାସୁଦ ଓ ସାଲେହ ଗୋଷ୍ଠୀଙ୍କର ଘମାଘୋଟ ଲଢେଇ

କାବୁଲ: କାବୁଲ ବିମାନ ବନ୍ଦରରୁ ଆମେରିକା ସୈନ୍ୟ ସମ୍ପୂର୍ଣ୍ଣ ଭାବରେ ଓହରି ଯିବାପରେ ତାଲିବାନ ଆତଙ୍କି ଗୋଷ୍ଠୀ ସଂପ୍ରତି ସେମାନଙ୍କ କବଳରୁ ମୁକ୍ତ ରହିଯାଇଥିବା ପଞ୍ଜଶିର ଅଞ୍ଚଳ ଉପରେ ଦୃଷ୍ଟିନିବଦ୍ଧ କରିଛନ୍ତି। ପରୱାନ ପ୍ରଦେଶରେ ତାଲିବାନ ଆତଙ୍କି ଏବଂ ଅହମଦ ମାସୁଦ ତଥା ଦେଶର ପୂର୍ବତନ ଉପରାଷ୍ଟ୍ରପତି ଅମରୁଲ୍ଲା ସାଲେହଙ୍କ ନେତୃତ୍ୱାଧୀନ ଲଢୁଆ ଗୋଷ୍ଠୀ ମଧ୍ୟରେ ଘମାଘୋଟ ଲଢେଇ ଆରମ୍ଭ ହୋଇଯାଇଛି। ସ୍ଥାନୀୟ ଗଣମାଧ୍ୟମ ରିପୋର୍ଟ ମୁତାବକ ଆଫଗାନିସ୍ତାନରେ ସଂପ୍ରତି କେବଳ ପଞ୍ଜଶିରର ଲଢୁଆମାନେ ତାଲିବାନର ମୁକାବିଲା କରୁଛନ୍ତି। ଚାଲିଥିବା ଲଢେଇରେ ଉଭୟ ପକ୍ଷରୁ ବହୁ ମୃତାହତ ହୋଇଥିବା ଖବର ମିଳିଛି।
ଅହମଦ ମାସୁଦଙ୍କର ନିକଟତମ ସୂତ୍ରରୁ ଜଣାଯାଇଛି ଯେ ତାଲିବାନ ଆତଙ୍କିମାନେ ପଞ୍ଜଶିରରେ ସୋମବାର ସଂଧ୍ୟାରେ ଏକ ଆଉଟପୋଷ୍ଟ ଉପରେ ଆକ୍ରମଣ କରିଥିଲେ। ତେବେ ବିରୋଧୀ ଗୋଷ୍ଠୀ ସେମାନଙ୍କ ଉପରେ ପାଲଟା ଆକ୍ରମଣ କରି ତାହାର କଡା ଜବାବ ଦେଇଥିଲେ। ଦୁଇ ପକ୍ଷ ମଧ୍ୟରେ ମଝିରେ ମଝିରେ ଗୁଳିଗୋଳା ବିନିମୟ ଚାଲିଛି। ତେବେ ଏ ସର୍ମ୍ପକରେ ତାଲିବାନ ପକ୍ଷରୁ କିଛି କୁହାଯାଇନାହିଁ। ପଞ୍ଜଶିରର ସ୍ଥାନୀୟ ବାସିନ୍ଦା କହିଛନ୍ତି, ତାଲିବାନ ଆତଙ୍କି ସେମାନଙ୍କ ଅଞ୍ଚଳରେ ଦୁଇଦିନ ହେଲା ଇଂଟରନେଟ ସେବାକୁ ବିଚ୍ଛିନ୍ନ କରିଦେଇଛନ୍ତି। ସୂଚନାଯୋଗ୍ୟ ଯେ ହିନ୍ଦକୁଶ ପର୍ବତମାଳାରେ ଥିବା ପଞ୍ଜଶିର କାବୁଲର ଉତ୍ତରକୁ ପ୍ରାୟ ୧୫୦ କିଲୋମିଟର ଦୂରରେ ଅବସ୍ଥିତ। ଏହାର ଅଧିବାସୀ ତାଲିବାନକୁ ଦୃଢ ବିରୋଧ କରୁଛନ୍ତି।