ଲଣ୍ଡନ ..- କିଙ୍ଗ୍ଫିସରର ମାଲିକ ବିଜୟ ମାଲ୍ୟାଙ୍କ ଭାରତକୁ ପ୍ରତ୍ୟାର୍ପଣ ପାଇଁ ପଥ ପରିଷ୍କାର ହୋଇଛି । ବିଜୟ ମାଲ୍ୟାଙ୍କୁ ଭାରତ ପଳାତକ ଭାବେ ଘୋଷଣା କରିଥିଲା । ହଜାର ହଜାର କୋଟି ଟଙ୍କା ଋଣ ନେବା ପରେ ବିଜୟ ମାଲ୍ୟା ଏହାକୁ ପରିଶୋଧ କରି ନଥିଲେ । ପରେ ସେ ଭାରତରୁ ପଳାୟନ କରିଥିଲେ । ସେ ଇଂଲଣ୍ଡରେ ଆଶ୍ରୟ ନେଇଥିଲେ । ଏହାପରେ ଭାରତର ଅନୁସନ୍ଧାନକାରୀ ସଂସ୍ଥା ପକ୍ଷରୁ ଲଣ୍ଡନର ଅଦାଲତରେ ବିଜୟ ମାଲ୍ୟାଙ୍କର ପ୍ରତ୍ୟାର୍ପଣ ପାଇଁ ଆବେଦନ କରାଯାଇଥିଲା ।
ଫେବ୍ରୁଆରୀ ୩ ତାରିଖରେ ବ୍ରିଟେନର ଗୃହ ବିଭାଗ ପକ୍ଷରୁ ମାଲ୍ୟାଙ୍କ ଘଟଣାକୁ ଗୁରୁତର ସହ ନିଆଯାଇ ଏ ବିଷୟରେ ଅନୁଧ୍ୟାନ କରାଯାଇଥିଲା । ବ୍ରିଟେନର ଗୃହ ବିଭାଗର ମୁଖପାତ୍ର ଏ ବିଷୟରେ ସୂଚନା ଦେଇଥିଲେ । ଗୃହ ବିଭାଗ ଭାରତର ସମସ୍ତ ପ୍ରମାଣକୁ ଅନୁଧ୍ୟାନ କରିବା ପରେ ବିଜୟ ମାଲ୍ୟାଙ୍କୁ ପ୍ରତ୍ୟାର୍ପଣ ପାଇଁ ଅନୁମତି ପ୍ରଦାନ କରିଛନ୍ତି । ମାଲ୍ୟାଙ୍କ ନିକଟରେ ସରକାରଙ୍କ ଏହି ନିଷ୍ପତ୍ତି ବିରୋଧରେ ଅଦାଲତକୁ ଯିବା ପାଇଁ ୧୪ ଦିନ ସମୟ ରହିଛି ।
ମାର୍ଚ୍ଚ ୨ ୨୦୧୬ ମସିହାରେ ବିଜୟ ମାଲ୍ୟା ଭାରତରୁ ପଳାୟନ କରିଥିଲେ । ସେ ୯ହଜାର କୋଟି ଟଙ୍କା ବିଭିନ୍ନ ବ୍ୟାଙ୍କରୁ ଋଣ ଆକାରରେ ନେବା ପରେ ଏହାକୁ ପରିଶୋଧ କରି ନ ଥିଲେ ।
ଗତ ବର୍ଷ ମାଲ୍ୟାଙ୍କର ପ୍ରତ୍ୟାର୍ପଣ ସମର୍ଥନରେ ଓ୍ୱେଷ୍ଟମିନିଷ୍ଟର ଅଦାଲତ ରାୟ ଦେଇଥିଲେ ।
