ନୂଆଦିଲ୍ଲୀ : ଉପରାଷ୍ଟ୍ରପତି ଭାବେ ଭେଙ୍କିଆ ନାଇଡୁଙ୍କ ଦ୍ୱାରା ଲିଖିତ ଏକ ପୁସ୍ତକକୁ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉନ୍ମୋଚନ କରିଛନ୍ତି। ‘ମୁଭିଂ…ଅନ୍ ମୁଭିଂ ଫର୍ୱାର୍ଡ: ଏ ଇଅର ଇନ୍ ଅଫିସ’ ଶୀର୍ଷକ ୨୪୫ ପୃଷ୍ଠା ସମ୍ବଳିତ ଏହି ପୁସ୍ତକରେ ନାଇଡୁ ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଭାବେ ବିଗତ ଏକ ବର୍ଷ ମଧ୍ୟରେ ସାଉଁଟିଥିବା ଅନୁଭୁତି ଓ ଉପଏବ୍ଧିକୁ ବର୍ଣ୍ଣାନା କରିଛନ୍ତି। ବିଶେଷକରି ନବଭାରତ ନିର୍ମାଣ ପ୍ରସଙ୍ଗ ସେ ଏଥିରେ ଉତ୍ଥାପନ କରିଛନ୍ତି। ପୁସ୍ତକଟିକୁ ମୋଦୀଙ୍କ ସମେତ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ ଓ ଦେବେଗୌଡା, ଲୋକସଭା ଅଧ୍ୟକ୍ଷ ସୁମିତ୍ରା ମହାଜନ ଏବଂ କେନ୍ଦ୍ରମନ୍ତ୍ରୀ ଅରୁଣ ଜେଟଲୀ ଅନାବରଣ କରିଥିଲେ। ପୁସ୍ତକଟିରେ ନାଇଡୁ ଲେଖିଛନ୍ତି, ୨୦୧୭ ଅଗଷ୍ଟ ୧୧ରେ ଉପରାଷ୍ଟ୍ରପତି ଭାବେ ଶପଥ ଗ୍ରହଣ କରିବା ପରେ ୪ଟି ପ୍ରମୁଖ ପ୍ରସଙ୍ଗରେ ଦେଶବ୍ୟାପୀ ବିଭିନ୍ନ ହିତାଧିକାରୀଙ୍କ ସହିତ ସମ୍ପର୍କ ସ୍ଥାପନ ନିମନ୍ତେ ସେ ସମଗ୍ର ଦେଶ ପରିଭ୍ରମଣ କରିଛନ୍ତି। ତେବେ ଉପରାଷ୍ଟ୍ରପତି ଭାବେ ତାଙ୍କର ବିଗତ ଏକ ବର୍ଷର କାର୍ଯ୍ୟକାଳ ଚ୍ୟାଲେଞ୍ଜପୂର୍ଣ୍ଣ ଏବଂ ଅସୀମିତ ସୁଯୋଗ ସମ୍ବଳିତ ସମୟ ଥିଲା। ଉନ୍ମୋଚନ କାର୍ଯ୍ୟକ୍ରମରେ ବକ୍ତବ୍ୟ ରଖି ନାଇଡୁ କହିଛନ୍ତି, ସମ୍ପ୍ରତି ଦେଶରେ ପରିବର୍ତନ ଆଣିବା ନିମନ୍ତେ ରାଜନୈତିକ ଇଚ୍ଛାଶକ୍ତିର ଆବଶ୍ୟକତା ରହିଛି। ଦେଶବାସୀଙ୍କୁ ମିଳିତ ଭାବେ ଏବଂ ଦୃଢତାର ସହ ଆଗକୁ ବଢିବାକୁ ହେବ। ସେହିଭଳି ରାଜ୍ୟସଭା ଅଧ୍ୟକ୍ଷ ଭାବେ ନିଜର ଅନୁଭୂତି ପ୍ରକାଶ କରି ସେ କହିଛନ୍ତି, ବିଭିନ୍ନ ପ୍ରସଙ୍ଗରେ ସଦସ୍ୟମାନେ ଯେଭଳି ନିଜ ମତ ତଥା ଅଭିଜ୍ଞତାକୁ ବ୍ୟକ୍ତ କରିପାରିବେ ସେଥିନେଇ ସାର୍ଥକ ଏବଂ ସୁବିଧାଜନକ ଆଲୋଚନା କରାଇବା ତାଙ୍କର ପ୍ରମୁଖ କର୍ତ୍ତବ୍ୟ। ଏହି ଅବସରରେ ପ୍ରଧାନମନ୍ତ୍ରୀ ମୋଦୀ ଏବଂ ମନମୋହନ ମଧ୍ୟ ନାଇଡୁଙ୍କ ନିଷ୍ଠାପରତା ଏବଂ କର୍ତ୍ତବ୍ୟପରାୟଣତାକୁ ପ୍ରଶଂସା କରିଥିଲେ।
