ବଲାଙ୍ଗିର: ବଜାରରେ ପରିବା ଦର ଅହେତୁକ ଭାବରେ ଦିନକୁ ଦିନ ବୃଦ୍ଧି ହେବାରେ ଲାଗିଛି। ବର୍ଷା ଦିନିଆଁ ଧାନ ଚାଷ ଯୋଗୁଁ ସ୍ଥାନୀୟ ଚାଷୀ ପରିବା ଚାଷ କରୁନଥିବା ବେଲେ ବାହାର ରାଜ୍ୟ(ଛତିଶଗଡ)ରୁ ପନିପରିବା ପ୍ରତ୍ୟେହ ଆସୁଛି ତଥା ଲକ୍ଡାଉନା କଟକଣା ଯୋଗୁଁ ଅନେକ ସପ୍ତାହିକ ହାଟ ବନ୍ଧ ରହୁଛି। ଏହାର ସୁଯୋଗ ନେଇ ବେପାରୀ ମନଇଚ୍ଛା ପରିବା ଦର ବଢାଇ ଚାଲିଥିବାର ଅଭିିଯୋଗ ଆସୁଛି। ଏହି ଦରବୃଦ୍ଧି ଯୋଗୁଁ ନିମ୍ନ ଏବଂ ମଧ୍ୟବିତ୍ତ ବର୍ଗର ସାଧଅରଣ ଜନତା ନାହିଁ ନଥିବା ଅସୁବିଧା ଭୋଗୁଛନ୍ତି। ଏବେ ବଜାରରେ ବାଇଗଣ -୪୦,ଟମାଟୋ-୬୦,ଆଳୁ – ୩୫,ପିଆଜ-୨୦,ପୋଟଲ-୫୦,ବନ୍ଧା କୋବି-୪୦, ଫୁଲ କୋବି – ୮୦,ଝୁଡଙ୍ଗ-୪୦,ଜହ୍ନି -୨୦,କଙ୍କଡୋ-୨୦୦,ଧନିଆପତ୍ର- ୧୬୦,ସାଗ -୫୦,କରଡି-୧୭୦ ଟଙ୍କାରେ କିଲୋପ୍ରତି ବିକ୍ରି ଚାଲିଛି। ଯାହାକି ଖାଉଟି ପାଇଁ ଲକ୍ଡାଉନ ସମୟରେ ବିଷମ ସମସ୍ୟା ସୃଷ୍ଟି କରୁଛି। ବିଶ୍ୱସ୍ତ ସୁତ୍ରରୁ ଜଣାଯାଏ , ଏସବୁ ପରିବା କମ ଦରରେ ବେପାରୀ କିଣି ପ୍ରାୟ ତିନିଗୁଣା ଠାରୁ ଅଧିକ ମୂଲ୍ୟରେ ବିକ୍ରି କରୁଛନ୍ତି। ଯେପରି ଝୁଡଙ୍ଗ କିଲୋପ୍ରତି ୧୦ରୁ ୧୨ଟଙ୍କାରେ କିଣି ୪୦ରୁ ୫୦ ଟଙ୍କାରେ,ଧନିଆପତ୍ର ୫୦ରୁ ୬୦ ଟଙ୍କାରେ କିଣି ୧୫୦ରୁ ୧୭୦,ଟମାଟୋ ୧୫ରୁ ୨୦ ରେ କିଣି ୪୦ ଟଙ୍କାରେ ବିକ୍ରି କରୁଛନ୍ତି। ଫଳରେ ଆବଶ୍ୟକତାରୁ ଖୁବ୍ କମ ପରିବା କିଣି ପରିବାର ଚଳାଇବାର ଦୁଃଖ ମଧ୍ୟବିତ୍ତ ଏବଂ ନିମ୍ନ ବର୍ଗର ଲୋକେ ସହିବାକୁ ବାଧ୍ୟ ହେଉଛନ୍ତି। ଏପରି ସ୍ଥଳେ ପ୍ରଶାସନର ନୀରବତା ଖାଉଟି ପାଇଁ ଆହୁରି ବଡ ସମସ୍ୟା ହୋଇପଡିଛି। ଏସବୁ ପ୍ରତି ବିଭାଗୀୟ ଜିଲା ପ୍ରଶାସନ ଦୃଷ୍ଟି ଦେଇ ପରିବା ଦର ଯଥୋଚିତ ନିୟନ୍ତ୍ରଣରେ ରଖିବା ପାଇଁ ଖାଉଟି ମହଲରେ ଦାବି ହେଉଛି।
Popular Categories
Previous article
Next article