ସମାଜ ଡିଜିଟାଲ ଡେସ୍କ: ଏଣିକି ରଥରେ ମୋବାଇଲ ଫୋନ ବ୍ୟବହାର କରିପାରିବେନି ସେବାୟତ। ଠାକୁରଙ୍କ ଆଗରେ ଛିଡ଼ା ହୋଇ ଫଟୋ ବି ଉଠାଇପାରିବେ ନାହିଁ। ଶୁକ୍ରବାର ଶ୍ରୀମନ୍ଦିର ମୁଖ୍ୟ ପ୍ରଶାସକ ଭାବେ ବରିଷ୍ଠ ଆଇଏଏସ ଅଧିକାରୀ ଡ. ଅରବିନ୍ଦ ପାଢ଼ୀ ଦାୟିତ୍ଵ ନେବା ପରେ ଏହା କହିଛନ୍ତି। ଏ ବିଷୟରେ ସେବାୟତମାନଙ୍କ ସହିତ ଆଲୋଚନା କରାଯାଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି।
ସମସ୍ତ ଭକ୍ତଙ୍କୁ ଦର୍ଶନ ଦେବା ପାଇଁ ବର୍ଷକରେ ଥରେ ଚତୁର୍ଦ୍ଧାମୂର୍ତ୍ତି ରଥଯାତ୍ରାରେ ବାହାରିଥାଆନ୍ତି। ସେଥିପାଇଁ ପ୍ରତିବର୍ଷ ରଥଯାତ୍ରାରେ ଲକ୍ଷ ଲକ୍ଷ ଲୋକ ପୁରୀକୁ ଧାଇଁ ଆସନ୍ତି। ରଥରେ ମହାପ୍ରଭୁଙ୍କୁ ଦର୍ଶନ ପାଇଁ ଶ୍ରଦ୍ଧାଳୁ ବ୍ୟାକୁଳ ହୋଇପଡ଼ନ୍ତି। ହେଲେ କିଛି ସେବାୟତ ରଥରେ ଠାକୁରଙ୍କ ଆଗରେ ଛିଡ଼ା ହୋଇ ରହିବା ସହିତ ଠାକୁରଙ୍କ ଦର୍ଶନରେ ବାଧକ ସାଜନ୍ତି। ଏହା ସହିତ ଠାକୁରଙ୍କ ଆଗରେ ଛିଡ଼ା ହୋଇ ମୋବାଇଲ ଫୋନରେ ଫଟୋ ଉଠାନ୍ତି, ଯାହାକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥାଏ। ପ୍ରତି ରଥଯାତ୍ରାରେ ଏଭଳି ଦୃଶ୍ୟ ଦେଖିବାକୁ ମିଳେ। ଚଳିତ ଥର ବି ସମାନ ଦୃଶ୍ୟ ଦେଖିବାକୁ ମିଳିଥିଲା, ଯେଉଁଥିପାଇଁ ଭକ୍ତମାନେ ରଥରେ ଠାକୁରଙ୍କୁ ଦର୍ଶନ କରିବାରେ ସମସ୍ୟା ହୋଇଥିଲା।
Comments are closed.