ଅଲିଗଡ : ଉତ୍ତରପ୍ରଦେଶର ଅଲୀଗଡ ଜିଲାରେ ଶନିବାର ମଧ୍ୟାହ୍ନ ସମୟରେ ଏକ ଅଘଟଣ ଘଟିଛି। ବର୍ଷା କାରଣରୁ ଏକ ନିର୍ମାଣାଧୀନ ଘରର କାନ୍ଥ ଭୁଶୁଡି ପଡି ୭ ଜଣ ଶିଶୁ ଏହା ତଳେ ଦବି ଯାଇଛନ୍ତି। ହୁସେନପୁର ଶହଜାଦପୁର ଅଞ୍ଚଳରେ ହୋଇଥିବା ଏହି ଅଘଟଣରେ ୨ ଜଣ ଶିଶୁଙ୍କ ମୃତ୍ୟୁ ହୋଇଥିବା ନେଇ ଖବର ମିଳିଛି। ଏହାସହ ୫ ଜଣ ଆହତ ମଧ୍ୟ ହୋଇଛନ୍ତି। ସଭିଁଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି।
ସୂଚନାନୁଯାୟୀ, ଜିଲାର ଦାଦୋ ଅଞ୍ଚଳରେ ଏହି ଘଟଣା ଘଟିଛି। ହୁସେନପୁର ଶହଜାଦପୁରରେ ଏକ ଘର ତିଆରି ହୋଇଥିଲା। ଏହାର ନିକଟରେ ସ୍କୁଲରୁ ପଢା ସାରି ପିଲାମାନେ ଫେରୁଥିଲେ। ହଠାତ୍ ସେହି ସମୟରେ ନିର୍ମାଣାଧୀନ ଘରର କାନ୍ଥ ଭୁଶୁଡି ପଡିବାରୁ ୭ ଜଣ ପିଲା ଏହାତଳେ ଦବି ଯାଇଥିଲେ। ଏହାପରେ ସ୍ଥାନୀୟଲୋକେ ପ୍ରଥମେ ଉଦ୍ଧାରକାର୍ଯ୍ୟ ଆରମ୍ଭ କରିବା ସହ ପୁଲିସ ଓ ଉଦ୍ଧାରକାରୀ ଦଳଙ୍କୁ ଏନେଇ ଖବର ଦେଇଥିଲେ। କିଛି ଆହତଙ୍କ ଅବସ୍ଥା ଗୁରୁତର ରହିଥିବା କୁହାଯାଉଛି। ଘଟଣାର ତଦନ୍ତ କରାଯାଉଛି।
