ଟୋକିଓ: ଟୋକିଓ ଅଲିମ୍ପିକ୍ସରେ ଭାଗନେବାକୁ ଆସିଥିବା ଉଗାଣ୍ଡାର ପୁରୁଷ ଭାରୋତ୍ତୋଳକ ଜୁଲିଅସ୍ ସେକିତୋଲେକୋଙ୍କୁ ୪ ଦିନ ପରେ ଜାପାନ ପୁଲିସ ଠାବ କରିପାରିଛି। ମଧ୍ୟ ଜାପାନର ଏକ ଜାଗାରେ ସନ୍ଦେହଜନକ ଭାବେ ଜୁଲିଅସ୍ ବୁଲୁଥିବା ବେଳେ ପୁଲିସ ତାଙ୍କୁ ଧରିଥିଲା। ଜୁଲିଅସ୍ଙ୍କ ପାଖରେ ତାଙ୍କର ପରିଚୟ ପତ୍ର ଥିଲା ଏବଂ ସେ ତାଙ୍କ ନାମ ସଠିକ୍ ଭାବେ କହିଥିଲେ। ତାଙ୍କୁ ଅଲିମ୍ପିକ୍ ସ୍ଥଳକୁ ଅଣାଯାଇଛି।
ଶୁକ୍ରବାର ଜୁଲିଅସ୍ ସେକିତୋଲେକୋ ନିର୍ଦ୍ଧାରିତ ଅଭ୍ୟାସ ସ୍ଥଳକୁ ନ ଆସିବାରୁ ତାଙ୍କୁ ହୋଟେଲ କୋଠରୀରେ ଖୋଜା ଯାଇଥିଲା। ସେଠାରେ ଏକ ଲେଖା ମିଳିଥିଲା; ଯେଉଁଥିରେ ସେ ଆଉ ଫେରିବେନି ଏବଂ ତାଙ୍କ ଜିନିଷପତ୍ର ଉଗାଣ୍ଡାରେ ତାଙ୍କ ଘରକୁ ପଠାଇବାକୁ ଜୁଲିଅସ୍ ଅନୁରୋଧ କରିଥିଲେ। ପରେ ପୁଲିସକୁ ଖବର ଦିଆ ଯାଇଥିଲା। ଜାପାନରେ କରୋନା ସଂକ୍ରମଣ ଅଧିକ ଥିବା ବେଳେ ସଂଗରୋଧରୁ ବାହାରି ଖେଳାଳି ବାହାରକୁ ଚାଲିଯିବା ଉଗାଣ୍ଡା ଦଳ ସହ ଆୟୋଜକଙ୍କ ପାଇଁ ଚିନ୍ତାର ବିଷୟ ଥିଲା। ଜୁଲିଅସ୍ କହିଥିଲେ ଯେ କୋଟା ପଦ୍ଧତି ଯୋଗୁଁ ଅଲିମ୍ପିକ୍ସରେ ତାଙ୍କୁ ପ୍ରତିଦ୍ବନ୍ଦ୍ବିତା କରିବାର ସୁଯୋଗ ମିଳିବ ନାହିଁ ବୋଲି ଜାଣିବା ପରେ ସେ ପେଟ ପୋଷିବା ପାଇଁ କାମ ଖୋଜିବା ପାଇଁ ଚାଲି ଯାଇଥିଲେ। ପୁଲିସ କହିଥିଲା ଯେ ଜୁଲିଅସ୍ ମଧ୍ୟ ଜାପାନର ନାଗୋୟାକୁ ଯାଇଥିଲେ ଏବଂ ସେଠାରୁ ମିଏ ସହରକୁ ଯାଇଥିଲେ। ଉଗାଣ୍ଡାର ମୂଳ ଅଧିବାସୀ ରହୁଥିବା ଏକ ଘରେ ଜୁଲିଅସ୍ ବସିଥିବା ବେଳେ ପୁଲିସ ପହଞ୍ଚିଥିଲା। ଉଗାଣ୍ଡା ଦଳ ଜୁନ୍ରେ ଆସି ଟୋକିଓରେ ପହଞ୍ଚି ଯାଇଥିଲା।
Comments are closed.