ଟିଟିଲାଗଡ଼ : ଟିଟିଲାଗଡ଼ ଉପକାରାଗାରରୁ ଦୁଇ ଜଣ ହତ୍ୟା ଅଭିଯୁକ୍ତ ବିଚାରାଧୀନ କଏଦୀ ଫେରାର ହେବା ଘଟଣା ନେଇ ଆଜି ଜେଲ ବିଭାଗ ଡିଆଇଜି କୁଳମଣି ବେହେରା ସରଜମିନ ତଦନ୍ତ କରିଛନ୍ତି । ଟିଟିଲାଗଡ଼ ଉପଖଣ୍ଡ ଅନ୍ତର୍ଗତ ସିନ୍ଧେକେଲା ଥାନା ଅଞ୍ଚଳରେ ମାନସିକ ପୂରଣ ପାଇଁ ଦୁଇଟି ଶିଶୁ ବଳି ଦେଇଥିବା ଗୁଣିଆ ଶୋଭାବନ ରଣା ଏବଂ କେସିଙ୍ଗା ଡାକ୍ତରଖାନା ପରିସରରେ ଜଣେ ଶିଶୁକୁ କୂଅରେ ଫିଙ୍ଗି ମାରିଦେଵା ଅଭିଯୋଗରେ ଗିରଫ ସୁମିତ ବିହାରୀ ଜେଲରୁ ଫେରାର ମାରିଛନ୍ତି। ଶନିବାର ରାତ୍ରୀ ପ୍ରାୟ ୮ଟାରେ ପାଚେରୀ ଜେଲ ଡେଇଁ ଉଭୟେ ଫେରାର ମାରିଥିବା ଜେଲର ଚୈତନ୍ୟ ପ୍ରଧାନ କହୁଛନ୍ତି ।
ତେବେ ଉଭୟେ ଜେଲରଙ୍କ ଅତି ବିଶ୍ୱସ୍ତ ହୋଇଥିବା ନେଇ ବିନା ବାଧାରେ ଜେଲ ଭିତରେ ଓ ବାହାରେ ବିଚରଣ କରୁଥିବା ଆଲୋଚନା ହୋଇଛି । ଏପରିକି ଶୋଭାବନ ଜେଲ ପାଚେରୀ ବାହାରେ ଥିବା ଜେଲରଙ୍କ ଘର କାମ କରୁଥିବା ଜଣାଯାଇଛି । ସେଭଳି ସୁମିତ ଜେଲରେ ସର୍ଦ୍ଦାର ଭଳି ଥିଲେ। ତାଙ୍କ ଇସାରାରେ ସବୁ କିଛି ଚାଲୁଥିଲା ବୋଲି ଆଲୋଚନା ହେଉଛି । ଏନେଇ ଜେଲରଙ୍କୁ ପଚାରିବାରୁ ଉଭୟେ ଅଫିସରେ କମ୍ପ୍ୟୁଟର କାମ କରୁଥିଲେ ବୋଲି ସେ କହିଛନ୍ତି । ଶିଶୁ ବଳି ଦେଇଥିବା ଗୁଣିଆ ଶୋଭାବନ କିମ୍ବା ନାବାଳକର ହତ୍ୟାକାରୀ ସୁମିତଙ୍କ ସେଭଳି ଉଚ୍ଚ ଶିକ୍ଷିତ ନଥିବାବେଳେ ଏହି ଦୁଇ ଦୁର୍ଦ୍ଦାନ୍ତ ଅପରାଧୀଙ୍କୁ କେମିତି ଜେଲ ଅଧିକ୍ଷକ ଅଫିସ କାର୍ଯ୍ୟରେ ନିୟୋଜିତ କଲେ ସେ ନେଇ ପ୍ରଶ୍ନ ସୃଷ୍ଟି ହେଉଛି ।
ଜେଲ ଡିଆଇଜି ବେହେରା ଆଜି ଟିଟିଲାଗଡ଼ ଉପକାରାଗାର ପରିଦର୍ଶନ ପରେ ଉଭୟ ଅଭିଯୁକ୍ତଙ୍କ ଫେରାର ହେବା ପଛରେ ଜେଲ କର୍ମଚାରୀଙ୍କ ହାତ ଥିବା ସ୍ୱୀକାର କରିଛନ୍ତି । ଅନ୍ୟପକ୍ଷରେ ପୁଲିସ ପକ୍ଷରୁ ଟିଟିଲାଗଡ଼ ଥାନାରେ ଆଜି ଦିନ ସାରା ଜେଲ କର୍ମଚାରୀଙ୍କୁ ଡାକି ଏସ୍ଡ଼ିପିଓ ଅଙ୍କିତା କୁମ୍ବାର, ଆଇଆଇସି ଅବନୀ ସାହୁ ବ୍ୟାପକଙ୍କ ପକ୍ଷରୁ ପଚରାଉଚୁରା ଚାଲିଥିବା ଜଣାପଡିଛି । ଜେଲରେ ସିସିଟିଭି ଅକାମୀ ହୋଇଥିବା, ଠିକଣା ଦିନ ଜେଲ ଅଧିକ୍ଷକ ଛୁଟିରେ ଥିବା ଦର୍ଶଯିବା ଭଳି ଗଣମାଧ୍ୟମର ଅନେକ ପ୍ରଶ୍ନର ଉତ୍ତର ନଦେଇ ଜେଲ ବିଭାଗ ଡିଆଇଜି ଚାଲିଯିବା ସନ୍ଦେହ ସୃଷ୍ଟି କରିଛି ।
