ସମାଜ ପୋର୍ଟାଲ ଡେସ୍କ: ଭୁବନେଶ୍ୱରସ୍ଥିତ ଚନ୍ଦକା ସ୍ପେଶାଲ ଅପରେସନ ଗ୍ରୁପର ପ୍ରଶିକ୍ଷଣ ଚାଲିଥିବା ବେଳେ ହଠାତ ଗ୍ରେନେଡ୍ ବିସ୍ଫୋରଣ ହେବାରୁ ଜଣେ ହାବିଲଦାରଙ୍କ ମୃତ୍ୟୁ ଘଟିଛି। ମୃତ ହାବିଲଦାର ଜଣକ ହେଉଛନ୍ତି ପ୍ରକାଶ ସାହୁ ଓ ତାଙ୍କ ଘର ବରଗଡରେ। ସୂଚନା ଅନୁଯାୟୀ ଆଜି ଏସ୍ଓଜି ପ୍ରଶିକ୍ଷଣ କେନ୍ଦ୍ରରେ ଟ୍ରେନିଂ ଚାଲିଥିଲା ବେଳେ ଏକ ଗ୍ରେନେଡ ଅନ୍ୟ ଜଣେ ପ୍ରଶିକ୍ଷାର୍ଥୀଙ୍କ ଉପରେ ଫୁଟିବାକୁ ଯାଉଥିବା ବେଳେ ତାଙ୍କୁ ବଞ୍ଚାଇବାକୁ ଯାଇ ପ୍ରକାଶ ଗ୍ରେନେଡଟିକୁ ଧରି ବାହାରକୁ ଫୋପାଡ଼ି ଦେବାକୁ ଉଦ୍ୟମ କରିଥିଲେ ମଧ୍ୟ ତାହା ତାଙ୍କ ହାତରେ ଫୁଟି ଯାଇଥିଲା।
ତାଙ୍କୁ ଗୁରୁତର ଅବସ୍ଥାରେ ମେଡିକାଲ୍ରେ ଭର୍ତ୍ତି କରାଯାଇଥିଲା କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣାରେ ଅନ୍ୟ ୨ ଜଣଙ୍କୁ ମେଡିକାଲରେ ଭର୍ତ୍ତି କରାଯାଇଛି ଓ ସେମାନଙ୍କ ଅବସ୍ଥା ଗୁରୁତର ଥିବା ଜଣାପଡିଛି।
