ଭୁବନେଶ୍ୱର : ଓଡିଶାର ସାତକୋଶିଆ ଅଭୟାରଣ୍ୟ ଏକ ହଜାର ବର୍ଗ କିମି ହୋଇଥିବା ବେଳେ ମାତ୍ର ଗୋଟିଏ ବାଘ ସେଠାରେ ରହିଛି । ଅନ୍ୟପକ୍ଷରେ ମଧ୍ୟପ୍ରଦେଶ ଅଭୟାରଣ୍ୟରୁ ଆସିଥିବା ବାଘୁଣୀ ସୁନ୍ଦରୀ ପ୍ରାୟ ଦୁଇ ମାସରୁ ଅଧିକ ସମୟ ହେବ ଏନକ୍ଲୋଜର ମଧ୍ୟରେ ରହିଛି । ଆନ୍ତର୍ଜାତିକ ବ୍ୟାଘ୍ର ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସର୍ବ ଭାରତୀୟ ବ୍ୟାଘ୍ର ସର୍ବେକ୍ଷଣ ରିପୋର୍ଟ ୨୦୧୮ ଉନ୍ମୋଚନ କରି କହିଛନ୍ତି, ବାଘ ସଂରକ୍ଷଣ ଦିଗରେ ସରକାର ସବୁ ପ୍ରକାର ଉଦ୍ୟମ କରିବେ। ସେ କହିଛନ୍ତି, ବ୍ୟାଘ୍ର ଗଣନା ଫଳାଫଳ ପ୍ରତ୍ୟେକ ଭାରତୀୟ ଏବଂ ପ୍ରକୃତି ପ୍ରେମୀଙ୍କ ମନରେ ଆନନ୍ଦ ଦେଇଛି। ୨୦୧୨ ସୁଦ୍ଧା ବାଘ ସଂଖ୍ୟା ଦୁଇ ଗୁଣ କରିବା ଲକ୍ଷ୍ୟ ଧାର୍ଯ୍ୟ ହୋଇଥିବା ବେଳେ ଚାରି ବର୍ଷ ପୂର୍ବରୁ ସେହି ଲକ୍ଷ୍ୟ ପୂରଣ ହୋଇଥିବାରୁ ପ୍ରଧାନମନ୍ତ୍ରୀ ସନ୍ତୋଷ ପ୍ରକାଶ କରିଛନ୍ତି ।
ଦେଶରେ ୨୯୬୭ ବାଘ ରହିଥିବା ଓଡିଶାରେ ସଂଖ୍ୟା ୪୫ରୁ ହ୍ରାସ ପାଇ ୨୮ରେ ପହଞ୍ଚିଛି । ଓଡିଶାରେ ୨୦୦୬ରେ ୪୨ଟି ବାଘ ଥିବା ବେଳେ ତାହା ହ୍ରାସ ପାଇ ୨୦୧୦ରେ ୩୨ରେ ପହଞ୍ଚିଛି । ୨୦୧୪ରେ ବାଘ ସଂଖ୍ୟା ହ୍ରାସ ପାଇ ୨୮ରେ ପହଞ୍ଚିଛି । ୨୦୧୮ରେ ବାଘ ସଂଖ୍ୟା ସମାନ ଥିଲା। ଏହା ସହ ସୁନ୍ଦରଗଡ଼ର ହେମଗିରି ଜଙ୍ଗଲ, ହୀରାକୁଦର ଦେବ୍ରିଗଡ଼ ଅଭୟାରଣ୍ୟ ଓ ରାୟଗଡ଼ାର ମୁନିଗୁଡ଼ା ଜଙ୍ଗଲ ତିନିଟିରେ ମହାବଳ ବାଘ ବିଚରଣ କରୁଥିବା କ୍ୟାମେରାରେ କଏଦ୍ ହୋଇଛି।
