ଆଜମଗଡ଼: ଉତ୍ତର ପ୍ରଦେଶର ଆଜମଗଡ଼ ଜିଲା ସ୍ଥିତ ମୁବାରକପୁର ଥାନା ଅଞ୍ଚଳରେ ସୋମବାର ଏକ ଘରୁ ଗୋଟିଏ ପରିବାରର ୩ ଜଣଙ୍କ ମୃତଦେହ ଜବତ ହୋଇଛି। ଗୋଟିଏ ଘରୁ ମାଆ, ବାପା ଓ ଛୁଆର ମୃତଦେହ ମିଳିବା ପରେ ସ୍ଥାନୀୟ ଅଞ୍ଚଳରେ ଆଲୋଡ଼ନ ସୃଷ୍ଟି ହେବା ସହ ପୁଲିସ ଜୋରଦାର ଯାଞ୍ଚ ଚଳାଇଛି। କେହି ଦୁର୍ବୃତ୍ତ ଏହି ୩ ଜଣଙ୍କୁ ହତ୍ୟା କରିଥିବା ଜଣାପଡ଼ିଛି। ଆକ୍ରମଣରେ ଅନ୍ୟ ୨ଶିଶୁ ମଧ୍ୟ ଆହତ ହୋଇଛନ୍ତି।
ସୂଚନା ଅନୁସାରେ, ମୁବାରକପୁର ଥାନା ଅନ୍ତର୍ଗତ ଇବ୍ରାହିମପୁର ଗାଁରେ ରବିବାର ରାତିରେ ଇରଫାନ(୩୫) ଓ ପତ୍ନୀ ସାଦିୟା(୩୨) ନିଜ ୩ ପିଲାଙ୍କ ସହ ଶୋଇଥିଲେ। ବିଳମ୍ବିତ ରାତିରେ କେହି ଦୁର୍ବୃତ୍ତ ଇରଫାନ ଓ ତାଙ୍କ ପତ୍ନୀଙ୍କ ସମେତ ୨ ବର୍ଷର ଶିଶୁ ପୁତ୍ରକୁ ନିର୍ମମ ଭାବେ ହତ୍ୟା କରିଛି। ଏହାସହିତ ଦୁର୍ବୃତ୍ତଙ୍କ ଆକ୍ରମଣରେ ଅନ୍ୟ ୨ ଶିଶୁ, ଝିଅ ଆସରା(୧୦) ଓ ପୁଅ ଅୟାନ(୪) ମଧ୍ୟ ଆହତ ହୋଇଛନ୍ତି। ସ୍ଥାନୀୟ ଲୋକଙ୍କ କହିବାନୁସାରେ, ସୋମବାର ସକାଳେ ଯେତେବେଳେ ସେମାନେ ତାଙ୍କ ଘରକୁ ଯାଇଥିଲେ ସେଠାରେ ସମସ୍ତ ଜିନିଷ ଖେଳାଇ ହୋଇ ପଡ଼ିଥିବା ଦେଖିବାକୁ ପାଇଥିଲେ ଓ ୩ ଜଣଙ୍କ ମୃତଦେହ ପଡ଼ିଥିବା ମଧ୍ୟ ଦେଖିଥିଲେ। ଏହାପରେ ସେମାନେ ପୁଲିସକୁ ଖବର ଦେଇଥିଲେ। ଖବର ପାଇ ପୁଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
Comments are closed.