ନୂଆଦିଲ୍ଲୀ : ରାଜ୍ୟସଭାର ୫୪ ସାଂସଦଙ୍କ କାର୍ଯ୍ୟକାଳ ବୁଧବାର ସୁଦ୍ଧା ପୂରିଯାଉଛି। ଅବସର ନେଉଥିବା ଏହି ସାଂସଦଙ୍କ ମଧ୍ୟରେ ବରିଷ୍ଠ କଂଗ୍ରେସ ନେତା ତଥା ପୂର୍ବତନ ପ୍ରଧାନମନ୍ତ୍ରୀ ଡ ମନମୋହନ ସିଂହଙ୍କ ସମେତ ଦୁଇ କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ ଓ ଭୂପେନ୍ଦ୍ର ଯାଦବ ସାମିଲ ଅଛନ୍ତି। ଅପରପକ୍ଷରେ ୭ କେନ୍ଦ୍ରମନ୍ତ୍ରୀ ଯଥା ଧର୍ମେନ୍ଦ୍ର ପ୍ରଧାନ, ମନସୁଖ ମାଣ୍ଡ୍ଭିୟା, ପୁରୁଷୋତ୍ତମ ରୁପାଲା, ରାଜୀବ ଚନ୍ଦ୍ରଶେଖର, ଭି.ମୁରଲୀଧରନ, ନାରାୟଣ ରାଣେ ଓ ଏଲ.ମୁରୁଗାନଙ୍କ କାର୍ଯ୍ୟକାଳ ମଙ୍ଗଳବାର ଶେଷ ହୋଇଛି। ଅବସର ନେଇଥିବା ଅନ୍ୟ ସାଂସଦଙ୍କ ମଧ୍ୟରେ ସମାଜବାଦୀ ପାର୍ଟିର ଜୟା ବଚ୍ଚନ ଓ ଆରଜେଡିର ମନୋଜ ଝା ଏବଂ କଂଗ୍ରେସର ଅଭିଷେକ ମନୁ ସିଂଘଭୀ ଅନ୍ୟତମ। ଜୟା ଓ ମନୋଜଙ୍କୁ ସେମାନଙ୍କ ଦଳ ପୁଣି ଥରେ ରାଜ୍ୟସଭାକୁ ପଠାଇଥିବାବେଳେ ନିକଟରେ କ୍ରସ ଭୋଟିଂ ଯୋଗୁଁ ସିଂଘଭୀ ରାଜ୍ୟସଭା ନିର୍ବାଚନରେ ପରାଜିତ ହୋଇଛନ୍ତି। ରାଜ୍ୟସଭାରୁ ଅବସର ନେଇଥିବା ୭ କେନ୍ଦ୍ରମନ୍ତ୍ରୀଙ୍କ ମଧ୍ୟରୁ କେବଳ ଅଶ୍ବିନୀ ବୈଷ୍ଣବଙ୍କୁ ବାଦ ଦେଇ ଅନ୍ୟମାନେ ଲୋକସଭା ନିର୍ବାଚନରେ ପ୍ରାର୍ଥୀ ହୋଇଛନ୍ତି।
Comments are closed.