ମୁମ୍ବଇ: ବିଜୟ ଦେବରକୋଣ୍ଡା ଓ ମୃଣାଳ ଠାକୁର ତାଙ୍କ ଚଳଚ୍ଚିତ୍ର ‘ଦି ଫ୍ୟାମିଲି ଷ୍ଟାର’ର ମୁକ୍ତିଲାଭ ଅପେକ୍ଷାରେ ଅଛନ୍ତି। ଦର୍ଶକଙ୍କୁ ଏକ ପାରିବାରିକ ମନୋରଞ୍ଜନ ଭେଟି ଦେବାକୁ ସେମାନେ ସମ୍ପୂର୍ଣ୍ଣ ପ୍ରସ୍ତୁତ। ପୂର୍ବରୁ ଫିଲ୍ମର ପୋଷ୍ଟର ଓ ଟିଜର ପ୍ରଶଂସକଙ୍କ ଉତ୍ସାହ ବୃଦ୍ଧି କରିଥିବାବେଳେ ଏବେ ଏହି ଉତ୍ସାହକୁ ଚରମ ସୀମାରେ ପହଞ୍ଚାଇବା ପାଇଁ ନିର୍ମାତା ‘ଦି ଫ୍ୟାମିଲି ଷ୍ଟାର’ର ଦମ୍ଦାର୍ ଟ୍ରେଲର ରିଲିଜ୍ କରିଛନ୍ତି।
୨ମିନିଟ୍ ୨୬ସେକେଣ୍ଡର ଏହି ଟ୍ରେଲରରେ ବିଭିନ୍ନ ପ୍ରକାରର ଭାବନା ଚିତ୍ରିତ ହୋଇଛି, ଯେଉଁଥିରେ ଏକ ସମ୍ପୂର୍ଣ୍ଣ ପାରିବାରିକ ମନୋରଞ୍ଜନଧର୍ମୀ ଚଳଚ୍ଚିତ୍ରର ଝଲକ୍ ଦେଖିବାକୁ ମିଳିଛି। ଟ୍ରେଲରରେ ବିଜୟ ଏବଂ ମୃଣାଳଙ୍କ ମଧ୍ୟରେ ମଜାମସ୍ତି ଏବଂ ପ୍ରେମପୂର୍ଣ୍ଣ ସମ୍ପର୍କ ଦେଖିବାକୁ ମିଳିଛି। ତେବେ ଟ୍ରେଲର ଶେଷରେ ମୃଣାଳ ବିଜୟଙ୍କୁ ଚାପୁଡ଼ା ମାରୁଥିବା ନଜର ଆସିଛନ୍ତି।
୨୦୧୮ର ବ୍ଲକବଷ୍ଟର ଚଳଚ୍ଚିତ୍ର ‘ଗୀତା ଗୋବିନ୍ଦମ’ ପରେ ବିଜୟ ଦେବରକୋଣ୍ଡା ଓ ନିର୍ଦେଶକ ପରଶୁରାମ ପେଟଲା ‘ଦି ଫ୍ୟାମିଲି ଷ୍ଟାର’ରେ ଦ୍ବିତୀୟ ଥର ପାଇଁ ଏକାଠି କାମ କରୁଛନ୍ତି। ଫିଲ୍ମରେ ବିଜୟ ଓ ମୃଣାଳଙ୍କ ବ୍ୟତୀତ ଜଗପତି ବାବୁ, ଅଚ୍ୟୁତ କୁମାର, ବାସୁକୀ, ରୋହିଣୀ ହଟ୍ଟଙ୍ଗଡ଼ି, ରବି ବାବୁ, ଦିବ୍ୟାଂଶ କୌଶିକ ଓ ଅଜୟ ଘୋଷ ପ୍ରମୁଖ କଳାକାର ଗୁରୁତ୍ବପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି। ‘ଦି ଫ୍ୟାମିଲି ଷ୍ଟାର’ ଆସନ୍ତା ଏପ୍ରିଲ ୫ରେ ପ୍ରେକ୍ଷାଳୟରେ ତାମିଲ, ତେଲୁଗୁ ଓ ହିନ୍ଦୀ ଭାଷାରେ ମୁକ୍ତିଲାଭ କରିବ।
Comments are closed.