ଠାକୁରମୁଣ୍ଡା : ହାତୀ ଆକ୍ରମଣରେ ମହିଳା ମୃତ । ଏପରି ଦୁଃଖଦ ଘଟଣା ସାମ୍ନାକୁ ଆସିଛି ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଅନ୍ତର୍ଗତ ସରଭାଡ଼ି ଗ୍ରାମରୁ । ଆଜି ସକାଳ ୧୦ ଘଟିକା ସମୟରେ ସେହି ଗ୍ରାମର ରାଜେନ୍ଦ୍ର ନାଏକ ଏବଂ ତାଙ୍କ ସ୍ତ୍ରୀ ମାନୀ ନାଏକ ଜଙ୍ଗଲକୁ ପତ୍ର ତୋଳିବା ପାଇଁ ଯାଉଥିବା ସମୟରେ ଏକ ଦନ୍ତା ଆକ୍ରମଣ କରିଥିଲା । ଉଭୟ ସ୍ୱାମୀ ସ୍ତ୍ରୀ ହାତୀ ଦେଖି ଜୀବନ ବଞ୍ଚାଇବା ପାଇଁ ଜୀବନ ବିକଳରେ ଧାଇଁଥିଲେ ମଧ୍ୟ ମାନୀଙ୍କୁ ହାତୀଟି ଶୁଣ୍ଢରେ ଟେକି ନେଇ କଚାଡି ଦେବା ସହିତ ପାଦରେ ଦଳି ଦେଇଥିଲା । ହାତୀଟି ପାଦରେ ଦଳି ଦେବା ଫଳରେ ମାନିଙ୍କ ଅବସ୍ଥା ଗୁରୁତର ହୋଇଥିଲା।
ତେବେ ସେହି ସମୟରେ ରାଜେନ୍ଦ୍ର ପାଟି କରିବାରୁ ହାତୀଟି ଛାଡ଼ି ଚାଲି ଯାଇଥିଲା । ତେବେ ରାଜେନ୍ଦ୍ରର ପାଟିଶୁଣି ଆଖପାଖର ଲୋକେ ଘଟଣା ସ୍ଥଳରେ ପହଞ୍ଚି ଗୁରୁତର ମାନୀଙ୍କୁ ଉଦ୍ଧାର କରିବା ସହିତ ବନବିଭାଗକୁ ଖବର ଦେଇଥିଲେ । ତେବେ ବନବିଭାଗ ଖବର ପାଇ ସଙ୍ଗେ ସଙ୍ଗେ ଘଟଣାସ୍ଥଳକୁ ଯାଇ ଗୁରୁତର ମାନୀକୁ ଉଦ୍ଧାର କରି କରଂଜିଆ ଉପଖଣ୍ଡ ଚିକିତ୍ସାଲୟକୁ ଆଣି ଚିକିତ୍ସା କରିଥିଲେ । ହେଲେ ଏଠାରେ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ କଟକ ବଡ଼ମେଡିକାଲକୁ ସ୍ଥାନାନ୍ତର କରିଥିଲେ ଡାକ୍ତର । ହେଲେ ବଡ଼ମେଡ଼ିକାଲକୁ ନେଉଥିବା ବେଳେ ଆନନ୍ଦପୁର ଘଷିପୁରା ନିକଟରେ ଗୁରୁତର ମାନୀର ମୃତ୍ୟୁ ହୋଇଥିବା ଜଣାପଡିଛି ।
Comments are closed.