ଡେସ୍କ: ଦେଶର ଗରିବ ଶ୍ରେଣୀର ଲୋକମାନଙ୍କୁ ନିଃଶୁଳ୍କ ସହାୟତା ଯୋଗାଇ ଦେବା ଉଦ୍ଦେଶ୍ୟରେ ୨୦୧୭ରେ ଆରମ୍ଭ ହୋଇଥିବା ଟେଲି-ଆଇନ ସେବା ସଫଳତା ହାସଲ କରୁଛି। ଲୋକସଭାରେ ଗତକାଲି ଏକ ପ୍ରଶ୍ନର ଉତ୍ତରରେ ଆଇନ ରାଷ୍ଟ୍ରମନ୍ତ୍ରୀ ଅର୍ଜୁନ ରାମ ମେଘୱାଲ କହିଛନ୍ତି, ଏହି ଯୋଜନାରେ ଏ ପର୍ଯ୍ୟନ୍ତ ସାରା ଦେଶରୁ ୬୨ ଲକ୍ଷରୁ ଅଧିକ ଲୋକ ଆଇନଗତ ସହାୟତା ପାଇଛନ୍ତି।
ଗତକାଲି ଲୋକସଭାରେ ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ ଓ ଅନ୍ୟମାନଙ୍କ ଦ୍ୱାରା ପଚରାଯାଇଥିବା ପ୍ରଶ୍ନର ଉତ୍ତରରେ କେନ୍ଦ୍ର ଆଇନ ରାଷ୍ଟ୍ରମନ୍ତ୍ରୀ କହିଛନ୍ତି, ହିତାଧିକାରୀଙ୍କୁ ଆଇନଗତ ପରାମର୍ଶ ଦେଉଥିବା ପ୍ୟାନେଲଭୁକ୍ତ ଓକିଲମାନଙ୍କୁ ଟେଲି-ଲ ’ଯୋଜନା ଅଧୀନରେ ତାଲିମ ପ୍ରଦାନ କରିବାର ବ୍ୟବସ୍ଥା ରହିଛି। ଚଳିତ ବର୍ଷ ନଭେମ୍ବର ୩୦ ସୁଦ୍ଧା, ଟେଲି-ଆଇନ ଯୋଜନାରୁ ପ୍ରାକ-ମକଦ୍ଦମା ପରାମର୍ଶ ଗ୍ରହଣ କରିଥିବା ବ୍ୟକ୍ତିଙ୍କ ସଂଖ୍ୟା ଉତ୍ତରପ୍ରଦେଶରେ ସର୍ବାଧିକ ୧୦ ଲକ୍ଷ ୪୫ ହଜାର ୨୯୨ ଥିଲା ବେଳେ ମଧ୍ୟପ୍ରଦେଶରେ ୬ ଲକ୍ଷ ୬୧ ହଜାର ୫୭୦ ଓ ମହାରାଷ୍ଟ୍ରରେ ୪ ଲକ୍ଷ ୬୬ ହଜାର ୨୧୩ ରହିଛି। ଓଡିଶାରୁ ଏ ପର୍ଯ୍ୟନ୍ତ ୨ ଲକ୍ଷ ୩୯ ହଜାର ୪୯୫ ଜଣ ଟେଲି-ଆଇନ ସହାୟତା ପାଇଛନ୍ତି। ସାରା ଦେଶରୁ ଚଳିତ ବର୍ଷ ନଭେମ୍ବର ଶେଷ ସୁଦ୍ଧା ୬୦ ଲକ୍ଷ ୨୩ ହଜାର ୨୨୨ ଜଣ ହିତାଧିକାରୀ ଟେଲି ଆଇନ ଯୋଜନା ଅଧୀନରେ ଆଇନ ସେବା ଦ୍ୱାରା ଉପକୃତ ହୋଇଛନ୍ତି। ସେମାନଙ୍କ ମଧ୍ୟରେ ୪୯ ହଜାର ୪୮୫ ମହିଳା ଅଛନ୍ତି।
