ଏକ ତରଫା ପ୍ରେମ; ନାବାଳିକାକୁ ଛୁରୀରେ ୧୪ ଥର ଆକ୍ରମଣ କଲା ଯୁବକ

ତାମିଲନାଡୁ : ଏକ ତରଫା ପ୍ରେମର କରୁଣ ପରିଣତି । ତାମିଲନାଡୁର ତ୍ରିଚିରେ ଜଣେ ୧୬ ବର୍ଷର ନାବାଳିକାକୁ ୨୨ ବର୍ଷର ଜଣେ ଯୁବକ ଲଗାତାର ୧୪ ଥର ଛୁରୀରେ ଆକ୍ରମଣ କରିଛିି । ନାବାଳିକାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ଅଭିଯୁକ୍ତ ଜଣକ ଏକାଦଶରେ ପଢୁଥିବା ଏହି ନାବାଳିକାଙ୍କୁ ଏକ ତରଫା ପ୍ରେମ କରୁଥିଲା । ମାତ୍ର ସେ ଏଥିରେ ରାଜି ନ ହେବାରୁ ଯୁବକ ଜଣକ ଏଭଳି ମରଣାନ୍ତକ ଆକ୍ରମଣ କରିଛି ।
ସୂଚନାନୁଯାୟୀ, ଅଭିଯୁକ୍ତ ଜଣକ କିଛି ଦିନ ପୂର୍ବରୁ ଉକ୍ତ ନାବାଳିକାଙ୍କୁ ଅପହରଣ କରିବା ଅଭିଯୋଗରେ ଜେଲ ଯାଇ ମୁକୁଳି ଥିଲେ । ଜେଲରୁ ବାହାରିବା ପରେ ପୁଣି ନାବାଳିକାଙ୍କୁ ପିଛା କରିବା ସହ ହଇରାଣ କରୁଥିଲେ । ନାବାଳିକା ଜଣକ ତ୍ରିଚିର ଆଥିକୁଲମର ବାସିନ୍ଦା । ପରୀକ୍ଷା ଶେଷ ହେବା ପରେ ସେ ନିଜ ପରିଜନଙ୍କ ଘରକୁ ଯାଉଥିଲେ । ସେହି ସମୟରେ ଅଭିଯୁକ୍ତ ତାଙ୍କୁ ଏକ ରେଲୱେ ଓଭରବ୍ରିଜ୍ ନିକଟରେ ଅଟକାଇ ପୁଣି କିଛି କହିବା ସହ ନାବାଳିକା ଅରାଜି ହେବାରୁ ଛୁରୀରେ ବାରମ୍ବାର ଆକ୍ରମଣ କରିଥିଲେ । ସେହି ସମୟରେ ତାଙ୍କର ଚିତ୍କାର ଶୁଣି ରାସ୍ତାରେ ଯାଉଥିବା ବ୍ୟକ୍ତି ମାନେ ସେଠାରେ ପହଞ୍ଚିବାରୁ ଅଭିଯୁକ୍ତ ଛୁରୀ ପକାଇ ଫେରାର ହୋଇଯାଇଥିଲା । ସ୍ଥାନୀୟଲୋକେ ନାବାଳିକାକୁ ହସ୍ପିଟାଲ ନେଇଥିଲେ । ସେଠାରେ ତାଙ୍କର ଚିକିତ୍ସା ଜାରି ରହିଥିବା ବେଳେ ଅବସ୍ଥା ଗୁରୁତର ରହିଛି ବୋଲି ଜଣାପଡିଛି ।
ପୁଲିସର ସୂଚନାନୁସାରେ, ଅଭିଯୁକ୍ତ ଜଣକ ତ୍ରିଚିର ପୋଥମେଟୁପଟିର ବାସିନ୍ଦା। ଅଭିଯୁକ୍ତ ବିରୋଧରେ ଏକ ମାମଲା ରୁଜୁ ହୋଇଛି। ଅଭିଯୁକ୍ତକୁ ଖୋଜାଖୋଜି ଆରମ୍ଭ ସହ ଏଥିପାଇଁ ତିନୋଟି ଦଳ ଗଠନ କରାଯାଇଛି।