ସିଡନୀ: ଅଷ୍ଟ୍ରେଲିଆର ସିଡନୀ କ୍ରିକେଟ୍ ଗ୍ରାଉଣ୍ଡରେ ଗୁରୁବାର ଠାରୁ ଚାଲିଥିବା ଭାରତ- ଅଷ୍ଟ୍ରେଲିଆ ମଧ୍ୟରେ ଚତୁର୍ଥ ତଥା ଅନ୍ତିମ ଟେଷ୍ଟରେ ଭାରତର ବିଶାଳ ୬୨୨/୭ ରନ୍ର ପିଛା କରୁଥିବା ଅଷ୍ଟ୍ରେଲିଆ ତୃତୀୟ ଦିନ ଶନିବାର ୨୩୬/୬ ରନ କରିଛି। ତୃତୀୟ ଦିନର ଖେଳ ଆହୁରି ୧୮ ଓଭର ବାକି ଥିବା ବେଳେ ଖରାପ ପାଗ ଯୋଗୁ ଅଧାରୁ ଖେଳ ବନ୍ଦ ରଖାଯାଇ ଷ୍ଟମ୍ପ ଅପସାରଣ କରି ନିଆଯାଇଛି । ଷ୍ଟମ୍ପ ଅପସାରଣ ବେଳକୁ ଅଷ୍ଟ୍ରେଲିଆ ଏବେ ବି ଭାରତ ଠାରୁ ୩୮୬ ରନ୍ ପଛରେ ରହିଛି। ପିଟର ହ୍ୟାଣ୍ଡସ୍କମ୍ବ ୨୮ ଓ ପ୍ୟାଟ୍ କମିନ୍ସ ୨୫ ରନ୍ କରି ଅପରାଜିତ ରହିଛନ୍ତି। ଭାରତୀୟ ବୋଲର କୁଲଦୀପ ଯାଦବ ଓ ରବୀନ୍ଦ୍ର ଜାଡେଜାଙ୍କ ଘାତକ ବୋଲିଂର ସାମ୍ନା କରିବା ଅଷ୍ଟ୍ରଲିଆ ପାଇଁ କଷ୍ଟକର ହୋଇପଡ଼ିଛି। ଭାରତୀୟ ଦଳ ପକ୍ଷରୁ ସିରିଜ୍ର ପ୍ରଥମ ମ୍ୟାଚ୍ ଖେଳୁଥିବା କୁଲଦୀପ ଯାଦବ ସର୍ବାଧିକ ୩ଟି ୱିକେଟ୍ ନେଇଥିବା ବେଳେ ରବୀନ୍ଦ୍ର ଜାଡେଜା ୨ଟି ଓ ମହମ୍ମଦ ଶାମି ଗୋଟିଏ ୱିକେଟ୍ ନେଇଛନ୍ତି।
