ନୂଆଦିଲ୍ଲୀ: ପ୍ରବାସୀ ଶ୍ରମିକ ଫେରିବା ପ୍ରସଙ୍ଗରେ ଓଡ଼ିଶା ହାଇକୋର୍ଟଙ୍କ ଆଦେଶନାମା ପରେ ଗୁରୁବାର ଦିନ ଦିଲ୍ଲୀରେ ସରକାରୀ କଳ ଚଳଚଞ୍ଚଳ ହୋଇପଡ଼ିଥିଲା। ମିଳିଥିବା ସୂଚନା ଅନୁଯାୟୀ ଘଟଣାକ୍ରମରେ ସିିଧାସଳଖ ହସ୍ତକ୍ଷେପ କରିବାକୁ ଗୁଜୁରାଟ ସରକାରଙ୍କ ତରଫରୁ କେନ୍ଦ୍ର ଗୃହ ମନ୍ତ୍ରାଳୟକୁ କୁହାଯାଇଥିଲା। ସଂଧ୍ୟାରେ କେନ୍ଦ୍ର ଗୃହ, ଆଇନ, ରେଳ ଓ ସଡ଼କ ପରିବହନ ମନ୍ତ୍ରାଳୟର ବରିଷ୍ଠ ଅଧିକାରୀ ମାନେ ଏକ ବୈଠକରେ ପରବର୍ତ୍ତୀ ରଣନୀତି ବିଷୟରେ ଚର୍ଚ୍ଚା କରିଥିଲେ। ବୈଠକ ପରେ କେନ୍ଦ୍ର ସରକାରଙ୍କ ସଲିସିଟର ଜେନେରାଲ ତୁଷାର ମେହେଟ୍ଟାଙ୍କ ପରାମର୍ଶ ନିଆଯାଇଥିଲେ।
ଶନିବାର ଓ ରବିବାର ଦୁଇ ଦିନ ସୁପ୍ରିମକୋର୍ଟ ଛୁଟି ଥିବାରୁ ଶୁକ୍ରବାର ଦିନ ପୂର୍ବାହ୍ନ ସୁଦ୍ଧା ଏସଏଲପି ଦାଖଲ କରିବାକୁ ସଲିସିଟର ଜେନେରାଲ ପରାମର୍ଶ ଦେଇଥିଲୋ। କେନ୍ଦ୍ର ଗୃହ ମନ୍ତ୍ରାଳୟର ଅତିରିକ୍ତ ସଚିବ ଜ୍ଞାନେସ କୁମାରଙ୍କୁ ସରକାର ଏବଂ ଓକିଲଙ୍କ ମଧ୍ୟରେ ସମନ୍ୱୟ ରକ୍ଷା କରିବାକୁ ଦାୟିତ୍ୱ ଦିଆଯାଇଥିଲା। ଶୁକ୍ରବାର ସକାଳେ କୋର୍ଟ ଖୋଲିବା ପୂର୍ବରୁ ସୁପ୍ରିମକୋର୍ଟ ରେଜିଷ୍ଟ୍ରିରେ ଏସଏଲପି ଦାଖଲ ଏବଂ ଅନ୍ୟାନ୍ୟ ପ୍ରକ୍ରିୟା ସରିଥିଲା। ପୂର୍ବାହ୍ନ ୧୦ଟାରେ ସୁପ୍ରିମକୋର୍ଟ କୋର୍ଟ ସଂଖ୍ୟା ୨ର ସପ୍ଲିମେଣ୍ଟାରୀ ଲିଷ୍ଟ ସଂଖ୍ୟା ୨୬ରେ ମାମଲା ଶୁଣାଣି ପାଇଁ ଧାର୍ୟ୍ୟ ହୋଇଥିଲା।
