ଭୁବନେଶ୍ବର: ଟ୍ରାଫିକ୍ କନେଷ୍ଟବଳ ଶୁଭମିତ୍ରା ସାହୁ ହତ୍ୟା ମାମଲା ତଦନ୍ତକୁ କ୍ରିୟାଶୀଳ କରୁଛି କମିସନରେଟ ପୁଲିସ। ତଦନ୍ତ ଆଗେଇବା ପରେ ଦୀପକର ଗୋଟିଏ ପରେ ଗୋଟିଏ ଗୁମର ଫିଟୁଛି। ଲକ୍ଷ୍ମୀସାଗର ଥାନା ଅଞ୍ଚଳରେ ଦୀପକ ୩୬ ଲକ୍ଷ ଟଙ୍କାରେ ଜମି କିଣିବାକୁ ଡିଲ୍ କରିଥିଲା। ଶୁଭମିତ୍ରାଙ୍କଠାରୁ ୫ଲକ୍ଷ ଟଙ୍କା ଆଣି ଅଗ୍ରିମ ଦେଇ କାଗଜପତ୍ର କରିଥିଲା। ଶୁଭମିତ୍ରାଙ୍କ ନାମରେ ୧୦ ଲକ୍ଷ ଟଙ୍କା ଋଣ ନେବାକୁ ଆବେଦନ କରିଥିଲେ। ଉକ୍ତ କାଗଜପତ୍ରଗୁଡ଼ିକୁ ଜବତ କରିଛି କମିସନରେଟ ପୁଲିସ। ଏଥିସହ ଦୀପକର ୩ଟି ଆକାଉଣ୍ଟ ଠାବ ହୋଇଛି। ସେଥିରେ ଲକ୍ଷ ଲକ୍ଷ ଟଙ୍କା ନେଣଦେଣ ହୋଇଥିବା ଜଣାପଡ଼ିଛି। ପ୍ରଥମ ପତ୍ନୀ ଅପର୍ଣ୍ଣା ପ୍ରିୟଦର୍ଶିନୀଙ୍କୁ ହତ୍ୟା କରି ଦୁର୍ଘଟଣା ରୂପ ଦେବା ଘଟଣାରେ ପ୍ରମାଣ ଯୋଗାଡ଼ ଜାରି ରହିଛି।
ଅପର୍ଣ୍ଣାଙ୍କ ପରିବାର ଲୋକଙ୍କ ସମେତ ୨୦ରୁ ଅଧିକ ବ୍ୟକ୍ତିଙ୍କୁ ପଚରାଉଚରା କରାଯାଇ ତଦନ୍ତ ପରିସରଭୁକ୍ତ କରାଯାଇଛି। ପୁରୁଣା ଫାଇଲ ଖୋଲି ପୁନଃ ତଦନ୍ତ ହୋଇଛି। ଦୁର୍ଘଟଣା ମାମଲାରେ ସାକ୍ଷୀ ପଡ଼ିଥିବା ବ୍ୟକ୍ତିଙ୍କୁ ଜେରା କରି ବୟାନ ସଂଗ୍ରହ ହୋଇଛି। ଖୁବ୍ଶୀଘ୍ର ଖୁଣ୍ଟୁଣୀ ଥାନା ପୁଲିସ ଦୀପକକୁ ରିମାଣ୍ଡରେ ନେଇ ଜେରା କରିବ ବୋଲି ବିଶେଷସୂତ୍ରରୁ ଜଣାପଡ଼ିଛି। ସେହିପରି ଶୁଭମିତ୍ରା ହତ୍ୟାକାଣ୍ଡ ମାମଲାରେ କେସ୍ ଡାଏରୀ ଓ ଚାର୍ଜସିଟ୍ ଲାଗି ପ୍ରକ୍ରିୟା ଆରମ୍ଭ ହୋଇଛି। ଦୁଇଦିନ ମଧ୍ୟରେ ରାଜ୍ୟ ଅପରାଧବିଧି ବିଜ୍ଞାନାଗାର (ଏସ୍ଏଫ୍ଏସ୍ଏଲ୍) ପଠାଯାଇଥିବା ନମୁନାଗୁଡ଼ିକର ରିପୋର୍ଟ ଆସିବ। ଏହି ରିପୋର୍ଟଗୁଡ଼ିକ କ୍ରାଇମ୍ବ୍ରାଞ୍ଚର ଫୋରେନସିକ୍ ଦଳ ସହାୟତାରେ ଫୁଙ୍ଖାନୁପୁଙ୍ଖ ଭାବେ ଯାଞ୍ଚ କରିବେ।
