ଆଠଗଡ : ସଂପ୍ରତି ଆଠଗଡ ଅଞ୍ଚଳରେ ୨ୟ ପର୍ୟ୍ୟାୟ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଉଥିବାରୁ କୋଭିଡ ପରିଚାଳନା ନେଇ ବିଜେପି ନେତା ଉପଜିଲ୍ଲାପାଳଙ୍କ ସହିତ ଶୁକ୍ରବାର ତାଙ୍କ କାର୍ୟ୍ୟାଳୟରେ ଆଲୋଚନା କରି କେତେକ ପଦକ୍ଷେପ ନେବା ପାଇଁ ପରାମର୍ଶ ଦେଇଥିଲେ। ବରିଷ୍ଠ ନେତା ତଥା ରାଜ୍ୟ କାର୍ୟ୍ୟକାରିଣୀ ସଦସ୍ୟ ବ୍ରଜେନ୍ଦ୍ର କୁମାର ରାୟ ଅନ୍ୟ ସହଯୋଗୀଙ୍କ ସହିତ ଉପଜିଲ୍ଲାପାଳଙ୍କ କାର୍ୟ୍ୟାଳୟକୁ ଯାଇ ଆଠଗଡରେ କରୋନା ସଂକ୍ରମଣ ଓ ସଂକ୍ରମିତଙ୍କ ବିଭିନ୍ନ ସମସ୍ୟା ସଂପର୍କରେ ଆଲୋଚନା କରିଥିଲେ। ବିଶେଷକରି ଗ୍ରାମାଞ୍ଚଳରେ ସଂକ୍ରମିତଙ୍କ ସଂଖ୍ୟା ଆଶାତୀତ ଭାବେ ବୃଦ୍ଧି ପାଉଥିବାରୁ ବିଜେପି ନେତା ଶ୍ରୀ ରାୟ ଚିନ୍ତା ପ୍ରକଟ କରିବା ସହ ପ୍ରଶାସନ ପକ୍ଷରୁ ବ୍ୟାପକ ସଚେତନତା ଉପରେ ଗୁରୁତ୍ୱାରୋପ କରିଥିଲେ। ତା ଛଡା ଟୀକାକରଣକୁ ତ୍ୱରାନ୍ୱିତ ଓ ବ୍ୟବସ୍ଥିତ କରାଇବା, ସୁବିଧା ନଥିବା ସଂକ୍ରମିତଙ୍କୁ ଘରେ ପୃଥକବାସରେ ନରଖି କୋଭିଡ ଚିକିତ୍ସାଳୟକୁ ସ୍ଥାନାନ୍ତରିତ କରିବା, ଘରେ ପୃଥକବାସରେ ରହୁଥିବା ସଂକ୍ରମିତଙ୍କୁ ଉପଯୁକ୍ତ ଚିକିତ୍ସା ସେବା ଯୋଗାଇଦେବା, ସହରାଞ୍ଚଳ ଓ ଗ୍ରାମାଞ୍ଚଳରେ ବ୍ୟାପକ ବିଶୋଧନ କରିବା ଉପରେ ବିଜେପି ନେତାମାନେ ଗୁରୁତ୍ୱ ଦେବା ପାଇଁ ଉପଜିଲ୍ଲାପାଳଙ୍କୁ ଅନୁରୋଧ କରିଥିଲେ। ଉପଜିଲ୍ଲାପାଳ ଅଜାମ୍ବର ମହାନ୍ତି ଆଠଗଡରେ କୋଭିଡ ପରିଚାଳନା ନେଇ ପ୍ରଶାସନ ପକ୍ଷରୁ ନିଆଯାଉଥିବା ବିଭିନ୍ନ ପଦକ୍ଷେପ ବିଷୟରେ ସେମାନଙ୍କୁ ଅବଗତ କରାଇଥିଲେ। ପ୍ରଶାସନ ପକ୍ଷରୁ ଏବେ ଆଠଗଡ ଓ ତିଗିରିଆ ବ୍ଲକରେ ଏକମାସ ବ୍ୟାପୀ ନିୟମିତ ଡାକବାଜି ଯନ୍ତ୍ର ଯୋଗେ ଲୋକଙ୍କୁ ସଚେତନ କରାଯିବ ବୋଲି ଉପଜିଲ୍ଲାପାଳ କହିଥିଲେ। ବିଜେପି ଦଳ ପକ୍ଷରୁ ମଧ୍ୟ ସହରାଞ୍ଚଳ ସମେତ ଗ୍ରାମାଞ୍ଚଳରେ ଲୋକଙ୍କୁ ବ୍ୟାପକ ସଚେତନ କରିବା, ମାସ୍କ ଓ ସାନିଟାଇଜର ଆଦି ବଣ୍ଟନ କରାଯିବ ବୋଲି ଶ୍ରୀ ରାୟ ପ୍ରକାଶ କରିଥିଲେ। ଶ୍ରୀ ରାୟଙ୍କ ସହିତ ବରିଷ୍ଠ ବିଜେପି ନେତା ଜଗଦାନନ୍ଦ ତ୍ରିପାଠୀ, ପ୍ରକାଶ ସେଠୀ, ବିଚିତ୍ରାନନ୍ଦ ଜେନା, ନଗର ମଣ୍ଡଳ ସଭାପତି ନଚିକେତା ପରମାଣିକ, ଉପସଭାପତି ପ୍ରଦୀପ ମହାପାତ୍ର ପ୍ରମୁଖ ଉପଜିଲ୍ଲାପାଳଙ୍କ ସହ ଆଲୋଚନା କରିଥିଲେ।
Comments are closed.