ଶ୍ରୀଲଙ୍କାକୁ ୯ ୱିକେଟରେ ହରାଇଲା ଭାରତ

ଗାଲେ : ଆଇସିସି ମହିଳା କ୍ରିକେଟ ଚମ୍ପିଆନସିପ୍‍ର ଯୋଗ୍ୟତା ପର୍ଯ୍ୟାୟରେ ଏଠାରେ ମଙ୍ଗଳବାର ଖେଳାଯାଇଥିବା ପ୍ରଥମ ମ୍ୟାଚରେ ଭାରତ ୯ ୱିକେଟରେ ଘରୋଇ ଶ୍ରୀଲଙ୍କାକୁ ପରାସ୍ତ କରିଛି। ଟସ୍‍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଶ୍ରୀଲଙ୍କା ୩୫.୧ ଓଭରରେ ୯୮ ରନରେ ଅଲଆଉଟ ହୋଇଥିଲା। ୯୯ ରନ୍‍ର ଲକ୍ଷ୍ୟକୁ ପିଛା କରିବାକୁ ଯାଇ ଭାରତ ୧୯.୫ ଓଭରରେ ଗୋଟିଏ ୱିକେଟ ବିନିମୟରେ ୧୦୦ ରନ କରିଥିଲା। ପୁନମ ରାଉତ ୨୪ ରନ କରି ଆଉଟ ହୋଇଥିବାବେଳେ ସ୍ମୃତି ମାନ୍ଧାନା ୭୩ (୧୧ ଚୌକା, ୨ ଛକା) ଓ ଅଧିନାୟିକା ମିତାଲି ରାଜ ୦ ରନରେ ଅପରାଜିତ ରହିଥିଲେ। ପୁନମ ଓ ସ୍ମୃତି ପ୍ରଥମ ୱିକେଟ ପାଇଁ ୧୮.୪ ଓଭରରେ ୯୬ ରନ ସଂଗ୍ରହ କରିଥିଲେ। ଶ୍ରୀଲଙ୍କା ପକ୍ଷରୁ ଇନୋକା ରଣୱିରା ଏକମାତ୍ର ୱିକେଟ ହାସଲ କରିଥିଲେ।
ଶ୍ରୀଲଙ୍କା ଅଧିନାୟିକା ଚାମାରି ଆଟାପାଟ୍ଟୁ ଜୟଙ୍ଗାନି ଟସ୍‍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ। ପ୍ରାରମ୍ଭରୁ ଶ୍ରୀଲଙ୍କା ଦଳ ନିୟମିତ ବ୍ୟବଧାନରେ ୱିକେଟ ହରାଇ ୩୫.୧ ଓଭରରେ ମାତ୍ର ୯୮ ରନରେ ଅଲଆଉଟ ହୋଇଥିଲା। ଅଧିନାୟିକା ଜୟଙ୍ଗାନି ସର୍ବାଧିକ ୩୩, ଶ୍ରୀପାଲି ୱିରାକୋଡି ୨୬ ଓ ଦିଲାନି ସୁରଙ୍ଗିକା ୧୨ ରନ କରିଥିବାବେଳେ ଦଳର ଅନ୍ୟ କୌଣସି ବ୍ୟାଟସମ୍ୟାନ ଦୁଇ ଅଙ୍କ ବିଶିଷ୍ଟ ସ୍କୋର କରିପାରିନଥିଲେ। ଭାରତ ପକ୍ଷରୁ ମାନସୀ ଜୋଷୀ ସର୍ବାଧିକ ୩ଟି ୱିକେଟ ଅକ୍ତିଆର କରିଥିବାବେଳେ ଝୁଲଣ ଗୋସ୍ୱାମୀ, ପୁନମ ଯାଦବ ୨ଟି ଲେଖାଏଁ ଏବଂ ଦୀପ୍ତି ଶର୍ମା, ରାଜେଶ୍ୱରୀ ଗାଏକୱାଡ୍‍ ଓ ହେମଲତା ପ୍ରତ୍ୟେକ ଗୋଟିଏ ୱିକେଟ ଅକ୍ତିଆର କରିଥିଲେ। ଭାରତ ଏହି ସିରିଜରେ ଆଉ ଦୁଇଟି ଦିନିକିଆ ଖେଳିବ। ଦ୍ୱିତୀୟ ଦିନିକିଆ ଚଳିତମାସ ୧୩ରେ ଓ ତୃତୀୟ ଦିନିକିଆ ୧୬ରେ ଖେଳାଯିବ।