ସୀତାରମଣଙ୍କ ପ୍ରଶଂସାରେ ଶତମୁଖ ଆମେରିକୀୟ ଶିଳ୍ପ ସଂସ୍ଥା

ନୂଆଦିଲ୍ଲୀ: ଭାରତର ଅର୍ଥନୈତିକ ଅଭିବୃଦ୍ଧି ସମ୍ପର୍କରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଥିବା ପଦକ୍ଷେପଗୁଡ଼ିକର ଆମେରିକା ଓ ଭାରତୀୟ ଶିଳ୍ପ ସଂସ୍ଥାଗୁଡ଼ିକ ପ୍ରଶଂସା କରିଛନ୍ତି। ଆମେରିକା-ଭାରତ ବ୍ୟବସାୟୀକ ପରିଷଦ ସଭାପତି ନିଶା ଦେଶାଇ ବିଶ୍ୱାଳ କହିଛନ୍ତି, ଏହା ଭାରତକୁ ବିଶ୍ୱରେ ପୁଞ୍ଜିନିବେଶର ଏକ ମୁଖ୍ୟ କେନ୍ଦ୍ରରେ ପରିଣତ କରିବ। ସେ କହିଛନ୍ତି, ପ୍ରସ୍ତାବିତ ସଂସ୍କାରଗୁଡ଼ିକ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବ। ଫିକି ସଭାପତି ସନ୍ଦୀପ ସୋମାନି କହିଛନ୍ତି, ମନ୍ଥରତା ଆଡ଼କୁ ଯାଉଥିବା ଭାରତୀୟ ଅର୍ଥନୀତିକୁ ଏହା ଅଭିବୃଦ୍ଧି ଦିଗରେ ଅଗ୍ରସର କରାଇବ।

ଆସୋଚାମ୍‍ ସଭାପତି ବି.କେ. ଗୋଏଙ୍କା କହିଛନ୍ତି, ଅଂଶଧନ ବଜାରରେ ବିଦେଶୀ ପୁଞ୍ଜିନିବେଶକାରୀମାନଙ୍କ ଉପରୁ ସରଚାର୍ଜ ପ୍ରତ୍ୟାହାର କରିନିଆଯିବା, ରାଷ୍ଟ୍ରାୟତ ବ୍ୟାଙ୍କ୍‍ଗୁଡ଼ିକୁ ୭୦ହଜାର କୋଟି ଟଙ୍କାର ଆଗୁଆ ପୁଞ୍ଜି ପ୍ରଦାନ ଓ ଆର୍ଥିକ ସହାୟତା ତଥା ଯାନବାହନ କ୍ଷେତ୍ର ଉପରେ ନୀତିରେ ସ୍ୱଚ୍ଛତା ଭଳି ନିଷ୍ପତ୍ତି ପୁଞ୍ଜିନିବେଶକାରୀ ଓ ଖାଉଟିମାନଙ୍କର ମନୋବଳ ବୃଦ୍ଧି କରିବ।