ଘର ଘର ବୁଲି ସର୍ଭେ ଆରମ୍ଭ

ଟିଟିଲାଗଡ଼ : ଟିଟିଲାଗଡ ପୌରପରିଷଦ ଅଞ୍ଚଳରେ କରୋନା ସଂକ୍ରମଣର ବୃଦ୍ଧି ପରିପ୍ରେକ୍ଷୀରେ ପ୍ରଶାସନ ତଥା ସ୍ୱାସ୍ଥ୍ୟ ବିଭାଗ ପକ୍ଷରୁ ବ୍ୟାପକ ତତ୍ପରତା ପ୍ରକାଶ ପାଇଛି। ଏନେଇ ଗତ କିଛି ଦିନ ହେଲା ଉପଜିଲାପାଳ ତଥା ଭାରପ୍ରାପ୍ତ ପୌର ନିର୍ବାହୀ ଅଧିକାରୀ ସୋମେଶ ଉପାଧ୍ୟାୟଙ୍କ ଅଧ୍ୟକ୍ଷତାରେ ପ୍ରତ୍ୟେହ ସଚେତନତା ବୈଠକ ସହ ମହମାରୀ ମୁକାବିଲା ନେଇ ରଣନୀତି ପ୍ରସ୍ତୁତ କରାଯାଇଛି। ପୌର ପରିଷଦ ପକ୍ଷରୁ ଏନେଇ ସ୍ୱତନ୍ତ୍ର କଣ୍ଟେ୍ରାଲ ରୁମ କାର୍ଯ୍ୟ ଆରମ୍ଭ କରିଛି। ଖୋଦ ଉପଜିଲାପାଳ ପୌର କାର୍ଯ୍ୟାଳୟରେ ପର୍ଯ୍ୟାୟ କ୍ରମେ ସ୍ୱାସ୍ଥ୍ୟ କର୍ମୀ, ଅଙ୍ଗନବାଡି କର୍ମୀ, ଆଶା ଦିଦିଙ୍କ ସହ ବୈଠକ କରି ସ୍ୱତନ୍ତ୍ର ତାଲିମ ପ୍ରଦାନ କରାଯାଇଛି। ଏନେଇ ଆଜି ଠାରୁ ସହରରେ ଯୁଦ୍ଧକାଳୀନ ଭିତିରେ ୭ ଦିନିଆ ଡୋର ଟୁ ଡୋର କ୍ୟାମ୍ପେନ ଆରମ୍ଭ ହୋଇଛି। ସ୍ୱାସ୍ଥ୍ୟ କର୍ମୀ, ଅଙ୍ଗନବାଡି କର୍ମୀ, ଆଶା ଆଦିଙ୍କୁ ନେଇ ଗଠିତ ୩ ଜଣିଆ ୨୮ଟି ଟିମ ସହରର ପ୍ରତ୍ୟେକ ୱାର୍ଡର ଘରକୁ ଘର ଯାଇ ଲୋକଙ୍କ ସ୍ୱାସ୍ଥ୍ୟାବସ୍ଥା ପରୀକ୍ଷା ଆରମ୍ଭ କରିଛନ୍ତି। ସ୍ୱାସ୍ଥ୍ୟ ଟିମ ପକ୍ଷରୁ ଘରର ସମସ୍ତ ସଦସ୍ୟଙ୍କ ବିବରଣୀ, ଫୋନ ନମ୍ବର ଲିପିବଦ୍ଧ ସହ ସ୍ୱାସ୍ଥ୍ୟାବସ୍ଥା ସମ୍ପର୍କରେ ତଥ୍ୟ ନିଆଯାଉଛି। ଏହି ଟିମର ରିପୋର୍ଟକୁ ତର୍ଜମା ପରେ ଅନ୍ୟ ଏକ ଟିମ ଅସୁସ୍ଥ ଚିହ୍ନଟ ଲୋକଙ୍କ ସ୍ୱାସ୍ଥ୍ୟ ପରିକ୍ଷା କରିବେ। ଆବଶ୍ୟକ ହେଲେ କୋଭିଡ ଟେଷ୍ଟ ସହ ଡାକ୍ତରୀ ପରାମର୍ଶ କ୍ରମେ ଚିକିତ୍ସା ବ୍ୟବସ୍ଥା କରାଯିବ। ଏନେଇ ନାଗରିକ କୌଣସି ସଙ୍କୋଚ ନକରି ନିଜ ପରିବାର ସମ୍ପର୍କରେ ନିର୍ଭୁଲ ତଥ୍ୟ ପ୍ରଦାନ କରିବାକୁ ପୌର ପରିଷଦ ପକ୍ଷରୁ ନିବେଦନ କରାଯାଇଛି।