ନୂଆଦିଲ୍ଲୀ: କାଶ୍ମୀରରେ ହିଂସା ଏବଂ ଆତଙ୍କବାଦର ବିସ୍ତାର ପାଇଁ ବିଚ୍ଛିନ୍ନତାବାଦୀ ନେତାମାନେ ଆତଙ୍କବାଦୀ ସଂଗଠନ ଲଶ୍କର-ଏ-ତୋଏବା ମୁଖ୍ୟ ହାଫିଜ ସୟିଦଠାରୁ କୋଟି କୋଟି ଟଙ୍କା ନେଇଛନ୍ତି। ଜାତୀୟ ତଦନ୍ତକାରୀ ସଂସ୍ଥା(ଏନଆଇଏ) ଏହା ଉପରୁ ପର୍ଦ୍ଦାଫାଶ କରିଛି। ବିଚ୍ଛିନ୍ନତାବାଦୀ ନେତା ୟାସିନ ମଲିକ, ଶବ୍ବୀର ଅହମ୍ମଦ ଶାହ, ମଶରତ ଆଲମ, ରଶିଦ ଇଞ୍ଜିନିୟର ସମେତ ଅନ୍ୟ କେତେଜଣଙ୍କୁ ହାଫିଜଠାରୁ ପାଣ୍ଠି ମିଳୁଥିଲା ବୋଲି ଏନଆଇଏ ଏହାର ରିପୋର୍ଟରେ ପ୍ରକାଶ କରିଛି।
ୟୁଏପିଏର ନୂଆ ଆଇନ ଅଧୀନରେ ଏନଆଇଏ ଏମାନଙ୍କ ବିରୋଧରେ ଚାର୍ଜଶିଟ୍ ଦାଖଲ କରିବ। ଏନଆଇଏ ୨୧୪ ପୃଷ୍ଠାର ରିପୋର୍ଟ ପ୍ରସ୍ତୁତ କରିଛି। ଏସବୁ ବିଚ୍ଛିନ୍ନତାବାଦୀମାନେ ହାଫିଜଠାରୁ ଟଙ୍କା ଆଣି କାଶ୍ମୀରରେ ଆତଙ୍କବାଦୀଙ୍କୁ ଯୋଗାଇବା ସହିତ ପଥରମାଡ଼ ପାଇଁ ପାଣ୍ଠି ସଂଗ୍ରହ କରୁଥିବା ନେଇ ଏନଆଇଏ ନିକଟରେ ଦୃଢ଼ ପ୍ରମାଣ ରହିଛି। ୟାସିନ ମଲିକଙ୍କ ଡିଜିଟାଲ ଡାଏରୀରୁ ଏପରି ତଥ୍ୟ ମିଳିଛି।
