ସମ୍ବଲପୁର: ପୁରୀ ଗଣଦୁଷ୍କର୍ମ ମାମଲାକୁ ଏକ ସପ୍ତାହ ବିତି ନଥିବା ବେଳେ ସମ୍ବଲପୁରରେ ଜଣେ ବିବାହିତ ମହିଳା ଗଣଦୁଷ୍କର୍ମର ଶିକାର ହୋଇଛନ୍ତି। ଏହି ଦୁଇଟି ଘଟଣାରେ ଅଭିଯୁକ୍ତ ସଂଖ୍ୟା ସମାନ ରହିଥିବା ବେଳେ ପୁଲିସ ଉଭୟ ମାମଲାକୁ ଗୁରୁତ୍ବର ସହ ନେଇଛି। ଏହି ଦୁଇଟି ମାମଲାକୁ ରେଡ୍ ଫ୍ଲାଗ୍ ବିବେଚନା କରାଯାଇଛି। ପୁରୀ ଗଣଦୁଷ୍କର୍ମ ମାମଲା ଭଳି ଏହି ମାମଲାରେ ମଧ୍ୟ ୨୦ ଦିନ ମଧ୍ୟରେ କୋର୍ଟରେ ଚାର୍ଜ ସିଟ୍ ଦାଖଲ କରାଯିବ ବୋଲି ସମ୍ବଲପୁର ଏସପି ସମ୍ବାଦିକ ସମ୍ମିଳନୀରେ କହିଛନ୍ତି।
ସମ୍ବଲପୁରରେ ବିବାହିତ ମହିଳାଙ୍କୁ ଗଣଦୁଷ୍କର୍ମ ମାମଲାରେ ପୁଲିସ ଅଟକ ରଖି ପଚରାଉଚରା କରୁଥିବା ୪ ଜଣ ଅଭିଯୁକ୍ତଙ୍କୁ ସୋମବାର ଗିରଫ କରିଛି।ସେମାନେ ହେଲେ ଶିବ ଶଙ୍କର ନାଏକ(୨୫), ଦୋଳମଣିଭୂଇ(୩୦), ମହେଶ ସେଠୀ(୨୪) ଏବଂ ଅକ୍ରୁର ଚୁରିଆ(୨୨)। ଏମାନେ ସମସ୍ତେ ସ୍ଥାନୀୟ ଅଞ୍ଚଳର ବୋଲି ଜଣାପଡିଛି। ଏହା ସହ ଡାକ୍ତଖାନାରେ ଚିକିତ୍ସାଧୀନ ଥିବା ପୀଡିତାଙ୍କର ଆଜି ଡାକ୍ତରୀମାଇନା ହେବ ବୋଲି ଏସପି କହିଛନ୍ତି। ବର୍ତ୍ତମାନ ପୀଡିତାଙ୍କ ଅବସ୍ଥା ସ୍ଥିର ଥିବା ଏସପି ସୂଚନା ଦେଇଛନ୍ତି।
ସୂଚନାଯୋଗ୍ୟ, ସମ୍ବଲପୁର ଜିଲା ହୀରାକୁଦ ଅଞ୍ଚଳର ଜଣେ ବିବାହିତ ମହିଳା ଶନିବାର ଦିନ କୌଣସି ଏକ କାମରେ ସମ୍ବଲପୁର ସହରକୁ ଆସିଥିବା ବେଳେ କାମ ସାରି ସନ୍ଧ୍ୟା ସମୟରେ ଘରକୁ ଫେରୁଥିଲେ। ଏହି ସମୟରେ ଦୁଇ ଜଣ ଯୁବକ ତାଙ୍କୁ ଘରେ ଛାଡି ଦେବା ପାଇଁ କହି ବାଇକରେ ନେଇ ଯାଇଥିଲେ। ପରେ ଏକ ନିଛାଟିଆ ସ୍ଥାନରେ ଦୁଇ ଯୁବକ ତାଙ୍କ ସହ ଦୁଷ୍କର୍ମ କରିବା ପରେ ଆଉ କିଛି ସାଥିଙ୍କୁ ମଧ୍ୟ ସେମାନେ ଡାକିଥିଲେ। ରାତି ସାରା ମହିଳାଙ୍କୁ ଦୁର୍ଷ୍କମ କରିବା ପରେ ପୀଡିତା ସଜ୍ଞାହୀନ ହୋଇ ପଡିଥିଲେ। ଦୁଷ୍କର୍ମକାରୀମାନେ ପୀଡିତାଙ୍କୁ ମୃତ ଭାବି ବରେଇପାଲିରୁ ଡେଙ୍ଗସର୍ଗି ଗ୍ରାମରେ ଫିଙ୍ଗି ଚାଲି ଯାଇଥିଲେ। ମହିଳା ଜଣକ ସେଠାରେ ସଜ୍ଞାହୀନ ଅବସ୍ଥାରେ ପଡି ରହିଥିବା ବେଳେ ରବିବାର ସକାଳ ପ୍ରାୟ ସାଢ଼େ ୮ଟା ସମୟରେ ସ୍ଥାନୀୟ ଲୋକେ ଅଇଁଠାପାଲୀ ପୁଲିସକୁ ଖବର ଦେଇଥିଲେ। ପୁଲିସ ଘଟଣାସ୍ଥଳକୁ ପହଞ୍ଚି ମହିଳାଙ୍କୁ ଉଦ୍ଧାର କରି ତାଙ୍କୁ ବୁର୍ଲା ଭିମସାରକୁ ନେଇଥିଲା। ରବିବାର ସନ୍ଧ୍ୟା ପ୍ରାୟ ୬ଟାରେ ମହିଳାଙ୍କ ହୋସ ଆସିବା ପରେ ଘଟଣା ବିଷୟରେ ପୁଲିସକୁ ବୟାନ ଦେଇଥିଲେ।
