ସମ୍ବଲପୁର: ସମ୍ବଲପୁରରେ ରାଜ୍ୟ ସରକାରଙ୍କ ଦ୍ୱାରା ମାଁ ସମଲେଶ୍ୱରୀ ମନ୍ଦିରର ପୁନଃବିକାଶ କାର୍ଯ୍ୟକ୍ରମ ‘ସମଲେଇ’ ଯୋଜନା ହାତକୁ ନିଆଯାଇଛି। ତେବେ ଏହି ଯୋଜନାକୁ କାର୍ଯ୍ୟାନ୍ୱୟନ ସମୟରେ ବିସ୍ଥାପନ ଓ ଉପଯୁକ୍ତ ଥଇଥାନର ଦାବିକୁ ନେଇ ଆରମ୍ଭରୁ ବିବାଦ ଜାରି ରହିଛି। ସମଲେଇ ଯୋଜନା କୁ କାର୍ଯ୍ୟକାରୀ କରିବା ପାଇଁ ମନ୍ଦିର ସମ୍ମୁଖରେ ଥିବା ଘୁନଘୁଟିପଡ଼ା ବସ୍ତିକୁ ଉଚ୍ଛେଦ କରାଯାଉଥିବାରୁ ଏହାକୁ ନେଇ ତୀବ୍ର ବିରୋଧ ଜାରି ରହିଛି। ବାରମ୍ବାର ବିରୋଧ, ବିକ୍ଷୋଭ ପ୍ରଦର୍ଶନ ଓ ଦାବି ସତ୍ୱେ ଉପଯୁକ୍ତ ଥଇଥାନ ଓ କ୍ଷତିପୂରଣ ମିଳି ନ ଥିବାର ଅଭିଯୋଗ ପଡ଼ାବାସୀ କରି ଆସୁଛନ୍ତି। ଏହା ସତ୍ୱେ କୌଣସି ସୁଫଳ ମିଳି ନ ଥିବାରୁ ପଡ଼ାବାସୀ ରାଜଧାନୀ ଭୁବନେଶ୍ୱରକୁ ଯାଇ ସେଠାରେ ବିକ୍ଷୋଭ ପ୍ରଦର୍ଶନ କରିବାକୁ ଯୋଜନା କରିଥିବାର ଜଣାପଡ଼ିଛି। ଏଣୁ ସମ୍ବଲପୁର ପୁଲିସ ପ୍ରଶାସନ କ୍ରିୟାଶୀଳ ହୋଇ ଘୁନଘୁଟୀପଡ଼ା ବାସୀଙ୍କୁ ଭୁବନେଶ୍ୱରକୁ ଯିବାକୁ ନ ଦେବା ପାଇଁ ବିଭିନ୍ନ ରେଳ ଷ୍ଟେସନ, ସରକାରୀ ଓ ବେସରକାରୀ ବସଷ୍ଟାଣ୍ଡ ସମେତ ବିଭିନ୍ନ ରାସ୍ତାରେ ସନ୍ଧ୍ୟା ସମୟରୁ ଜଗି ବସି ଚେକିଂ କରୁଛି। ପୁଲିସ ସୂତ୍ରରୁ ପ୍ରକାଶ ଯେ, ଏବେ ବିଧାନସଭା ଚାଲିଥିବାରୁ ଘୁନଘୁଟିପଡ଼ା ବାସିନ୍ଦା ଯେଭଳି ଭୁବନେଶ୍ୱରକୁ ଯାଇ ବିକ୍ଷୋଭ ପ୍ରଦର୍ଶନ ନ କରିବେ, ସେଥିପାଇଁ ସ୍ୱତନ୍ତ୍ର ରୂପେ ଯତ୍ନବାନ ରହିବାକୁ ନିର୍ଦ୍ଦେଶ ରହିଛି। ଏଣୁ ଆଜି ସନ୍ଧ୍ୟା ସମୟରୁ ରେଳ ଷ୍ଟେସନ, ବସଷ୍ଟାଣ୍ଡ ଓ ଅନ୍ୟାନ୍ୟ ଗୁରୁତ୍ୱପୁର୍ଣ୍ଣ ସ୍ଥାନ ଗୁଡିକରେ ମାଳ ମାଳ ପୁଲିସ ସହିତ ଅଧିକାରୀ ମାନେ ବ୍ୟାପକ ଚେକିଂ କରୁଛନ୍ତି। ତେବେ ସମ୍ବଲପୁର ପୁଲିସର ଏଭଳି ହିଟଲରୀ କାର୍ଯ୍ୟକୁ ସବୁ ମହଲରେ ନିନ୍ଦା କରାଯାଉଥିବା ବେଳେ ଏହା ଗଣତନ୍ତ୍ରର କଣ୍ଠରୋଧ ବୋଲି ସାଧାରଣରେ ଚର୍ଚ୍ଚା ହେଉଛି।
Popular Categories
Previous article
Next article