ମୁମ୍ବାଇ: ସଲମାନ ଖାନ ତାଙ୍କ ମଝିଆ ଭାଇ ଅରବାଜ ଖାନଙ୍କ ସହ ‘ପ୍ୟାର କିଆ କୋ ଡରନା କ୍ୟା’, ‘ଗର୍ବ’ ଓ ‘ଦବଙ୍ଗ’ ଭଳି ହିଟ୍ ସିନେମା ଦର୍ଶକଙ୍କୁ ଭେଟି ଦେଇଛନ୍ତି। ଏଥିସହ ସାନ ଭାଇ ସୋହେଲ ଖାନଙ୍କ ସହ ମଧ୍ୟ ସେ ‘ମୈନେ ପ୍ୟାର କ୍ୟୁଁ କିଆ’ ଓ ‘ବୀର’ ଆଦି ଚଳଚ୍ଚିତ୍ର କରିଛନ୍ତି। କିନ୍ତୁ ତିନି ଭାଇ କେବେ ଏକାଠି ବଡ଼ ପରଦାରେ ନଜର ଆସି ନାହାନ୍ତି। ସଲମାନ ପ୍ରଶଂସକଙ୍କର ଏହା ଦୀର୍ଘ ଦିନର ସ୍ବପ୍ନ ଯେ, ‘ଦବଙ୍ଗ’ ଷ୍ଟାର ତାଙ୍କ ଦୁଇ ଭାଇ ଅରବାଜ ଓ ସୋହେଲ ଖାନଙ୍କ ସହ ଫିଲ୍ମ କରନ୍ତୁ। ଆଉ ଏବେ ଲାଗୁଛି ପ୍ରଶଂସକଙ୍କ ଏହି ସ୍ବପ୍ନ ଶୀଘ୍ର ପୂରଣ ହେବାକୁ ଯାଉଛି। ଅରବାଜ ଖାନ ନିକଟରେ ଏକ ସାକ୍ଷାତକାରରେ ଏପରି କିଛି କହିଛନ୍ତି ଯାହା ଜଣାଉଛି ଯେ, ତିନି ଭାଇଙ୍କୁ ଖୁୁବଶୀଘ୍ର ଏକାଠି ବଡ଼ ପରଦାରେ ଦେଖିବାକୁ ମିଳିବ।
ସାକ୍ଷାତକାରରେ ଅରବାଜ କହିଛନ୍ତି ଯେ, ତିନି ଭାଇ ପରଦାରେ ଏକାଠି ନଜର ଆସିବାର ସୁଯୋଗ ଆଉ ବେଶୀ ଦୂର ନୁହେଁ। ସେ କହିଛନ୍ତି, ‘ହଁ ଏପରି ହେବାର ଏକ ବଡ଼ ସମ୍ଭାବନା ରହିଛି। ଯେତେବେଳେ ଏଭଳି ସୁଯୋଗ ଆସିବ ଆମେ ଏହାକୁ ଯିବାକୁ ଦେବୁନି। କଥା କେବଳ ଏତିକି ଯେ, ବର୍ତ୍ତମାନ ଆମେ ସବୁ ନିଜ ନିଜ କାମରେ ବ୍ୟସ୍ତ ଅଛୁ। କିନ୍ତୁ ସମୟ ନିଶ୍ଚିତ ଆସିବ ଯେତେବେଳେ ସୋହେଲ, ସଲମାନ ଓ ମୁଁ ପରଦାରେ ଏକାଠି ନଜର ଆସିବୁ ଏବଂ ଏଥିପାଇଁ ଆଉ ବେଶୀ ଦିନ ଅପେକ୍ଷା କରିବାକୁ ପଡ଼ିବ ନାହିଁ। ଏହା ଖୁବ ଶୀଘ୍ର ହେବାକୁ ଯାଉଛି।’’
Comments are closed.