ରେଙ୍ଗାଲି: ସମ୍ବଲପୁର ଜିଲା ରେଙ୍ଗାଲି ବ୍ଳକର ଲଇଡା ଠାରେ ଧାନ କିଣାବିକା ସକାଶେ ସ୍ଥାପିତ ବଜାର ଉପ-ପ୍ରାଙ୍ଗଣ ପରିସର ରେ ସଂପ୍ରତି ଚାଲିଥିବା ଗୋଦାମ ଗୃହ ନିର୍ମାଣ କାମରେ ଅନିୟମିତତା ହେଉଥିବାର ଦେଖିବକୁ ମିଳିଛି। ଉନ୍ନୟନ କାମରେ ପାରଦର୍ଶିତା ଏବଂ ସ୍ୱଚ୍ଛତା ଆଣିବାକୁ ଯେକୌଣସି ପ୍ରକଳ୍ପ କାମ ଆରମ୍ଭ ହେବା ପୂର୍ବରୁ ସୂଚନା ଫଳକ ତିଆରି କରି ସେଥିରେ ସଂପୃକ୍ତ ପ୍ରକଳ୍ପର ବ୍ୟୟ ଅଟକଳ ଏବଂ ଆନୁସଙ୍ଗିକ ତଥ୍ୟ ଉଲ୍ଲେଖ କରିବାକୁ ସରକାର ନିର୍ଦେଶ ଜାରି କରିଛନ୍ତି। କିନ୍ତୁ ଲଇଡା ବଜାର ଉପ-ପ୍ରାଙ୍ଗଣର ଗୋଦାମ ଗୃହ କାମ ଅଧାରୁ ଅଧିକ ହୋଇସାରିଥିଲେ ହେଁ ସୂଚନା ଫଳକର ଦେଖା ନାହିଁ। ଫଳରେ ଗୋଦାମ ଗୃହ ନିର୍ମାଣ ପାଇଁ କେତେ ଟଙ୍କା ମଞ୍ଜୁର ହୋଇଛି ଲୋକେ ଜାଣି ପାରୁ ନାହାନ୍ତି।
ସିମେଣ୍ଟ କାମରେ ପର୍ଯ୍ୟାପ୍ତ ପାଣି କ୍ୟୁରିଂ କରିବା ଜରୁରୀ ହୋଇଥିବା ବେଳେ ପାଣି କ୍ୟୁରିଂ ଠିକ୍ ଭାବରେ କରାଯାଉ ନଥିବାର ଦେଖିବାକୁ ମିଳୁଛି। ଦିନକୁ ମାତ୍ର ୨/୩ଘଣ୍ଟା ପାଣି ସିଞ୍ଚନ କରି ଦେଇ ନିର୍ମାଣ କାମ ଚାଲିଥିବାର ଜଣାପଡିଛି। ଫଳରେ ଗୋଦାମ ଗୃହର ସ୍ଥାୟିତ୍ୱ ନେଇ ସନ୍ଦେହ ସୃଷ୍ଟି ହେଉଛି। ଏହା ବ୍ୟତୀତ ନିର୍ମାଣ କାମରେ ଶସ୍ତା ମୂଲ୍ୟ ସିମେଣ୍ଟ ବ୍ୟବହାର କରାଯାଉଥିବାର ଦେଖିବାକୁ ମିଳୁଛି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଦିଗରେ ଦୃଷ୍ଟି ଦେଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି।
