ରାୟଗଡ଼ା: ରାୟଗଡ଼ା ଜିଲାର ସ୍ବାସ୍ଥ୍ୟ ସମସ୍ୟା ଓ ଖାଲିଥିବା ଡାକ୍ତର ପଦବୀ ପୂରଣ ନେଇ ଗୁରୁବାର ସ୍ୱାସ୍ଥ୍ୟ ସଚିବ ଶାଳିନୀ ପଣ୍ତିତଙ୍କ ସହ ଆଲୋଚନା ହୋଇଛି । ବିଜୁ ସ୍ଵାସ୍ଥ୍ୟ କଲ୍ୟାଣ ଯୋଜନା ଉପଦେଷ୍ଟା ସୁଧିର କୁମାର ଦାଶ, ରାୟଗଡ଼ା ବିଧାୟକ ମକରନ୍ଦ ମୁଦୁଲି ଓ ଗୁଣପୁର ବିଧାୟକ ରଘୁନାଥ ଗମାଙ୍ଗ ସଚିବାଳୟରେ ଆଲୋଚନା କରିଛନ୍ତି । ରାୟଗଡ଼ା ଓ ଗୁଣପୁର ଉପଖଣ୍ଡରେ ବିଶେଷଜ୍ଞ ଡାକ୍ତର ପଦବୀ ଖାଲିଥିବାରୁ ସ୍ଥାନୀୟ ଜନସାଧାରଣ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଜିଲାର ରୋଗୀମାନେ ବ୍ରହ୍ମପୁର, ଭୁବନେଶ୍ବର କଟକ ବିଶାଖାପାଟଣା ଯାଇ ଅଧିକ ଖର୍ଚ୍ଚାନ୍ତ ହେଉଛନ୍ତି । ଏପରିକି ଗୁଣୁପୁର ଉପଖଣ୍ଡରେ ଜଣେ ହେଲେ ବିଶେଷଜ୍ଞ ଡାକ୍ତର ନଥିବା ସ୍ବାସ୍ଥ୍ୟ ସଚିବଙ୍କୁ ଅବଗତ କରାଇଥିଲେ ତିନି ନେତା।
ସେହିପରି ଗୁମୁଡ଼ା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରକୁ ସିଏଚସି ମାନ୍ୟତା ଦେବାକୁ ପ୍ରସ୍ତାବ ଦେଇଛନ୍ତି । ଜିଲାର ପୁଟାସିଂ, ରଘୁବାରୀ, ଦିଡିମିରିଗୁଡା, ପାରଶାଲିରେ ହେଲ୍ଥ ସେଣ୍ଟର ସ୍ଥାପନ ନେଇ ସଚିବାଳୟରେ ସ୍ବାସ୍ଥ୍ୟ ସଚିବ ଶାଳିନୀ ପଣ୍ଡିତଙ୍କ ସହ ଆଲୋଚନା କରିଛନ୍ତି । ଗୁଣପୁରଠାରେ ୧୯ କୋଟି ଓ କାଶିପୁର ବ୍ଲକରେ ୯ କୋଟି ବ୍ୟୟରେ ନିର୍ମିତ ହେବାକୁ ଥିବା କୋଠା ଯଥାଶୀଘ୍ର ଟେଣ୍ଡର କରି କାମ ଶେଷ କରିବାକୁ ଅନୁରୋଧ କରିଥିଲେ । ପ୍ରଥମେ ଖାଲିଥିବା ବିଶେଷଜ୍ଞ ଡାକ୍ତରଙ୍କୁ ପଠେଇବା ସହ ଆସନ୍ତା ଏପ୍ରିଲ ଓ ସେପ୍ଟେମ୍ବର ସୁଦ୍ଧା ସମସ୍ତ ଡାକ୍ତର ପଦବୀ ପୂରଣ କରିଯିବ ବୋଲି ସ୍ବାସ୍ଥ୍ୟ ସଚିବ ପ୍ରକାଶ କରିଛନ୍ତି । ଏହାସହ ତୁରନ୍ତ ସମସ୍ତ ନିର୍ମାଣାଧିନ ମେଡିକାଲ ବିଲଡିଂ କାମ ଯୁଦ୍ଧକାଳୀନ ଭିତ୍ତିରେ ସମାପ୍ତ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ବିଜୁ ସ୍ୱାସ୍ଥ୍ୟ କାର୍ଡରେ ଲୋକମାନେ ଆନ୍ତଃଜିଲାରେ କିପରି ସୁବିଧା ପାଇପାରିବେ ସେ ବିଷୟରେ ମଧ୍ୟ ସ୍ବାସ୍ଥ୍ୟ ସଚିବଙ୍କ ସହ ତିନି ନେତାଙ୍କ ଆଲୋଚନା ହୋଇଛି।
ଏଠାରେ ସୂଚନାଯୋଗ୍ୟ ଯେ, ରାୟଗଡା ଜିଲାରେ ୧୦୩ ବିଶେଷଜ୍ଞ ଡାକ୍ତର ସହ ୧୫୮ଟି ଡାକ୍ତରୀ ପଦବୀ ଖାଲି ପଡିଛି।
