ନୂଆଦିଲ୍ଲୀ : ଆଇଏନ୍ଏକ୍ସ ମିଡିଆ ମାମଲାରେ ଗିରଫ୍ ହୋଇଥିବା ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ପି. ଚିଦମ୍ବରମ୍ଙ୍କ ସମର୍ଥନରେ କଂଗ୍ରେସ ଦଳ ଆଗେଇ ଆସିଛି। କେନ୍ଦ୍ରର ବିଜେପି ସରକାର ଚିଦମ୍ବରମ୍ଙ୍କ ବିରୋଧରେ ପ୍ରତିଶୋଧମୂଳକ କାର୍ଯ୍ୟନୁଷ୍ଠାନ ଗ୍ରହଣ କରିଛି ବୋଲି ଦଳ ପକ୍ଷରୁ କୁହାଯାଇଛି । କଂଗ୍ରେସ ମୁଖପାତ୍ର ରଣଦୀପ ସୁରେଜୱାଲା ଗୁରୁବାର ନୂଆଦିଲ୍ଲୀଠାରେ ଏକ ସାମ୍ବାଦିକ ସମ୍ମିଳନୀରେ ଏହା କହିଛନ୍ତି। ଚିଦମ୍ବରମ୍ଙ୍କ ଗିରଫଦାରୀକୁ ଦେଶରେ ଦିନ ଦ୍ବିପ୍ରହରରେ ଗଣତନ୍ତ୍ରର ହତ୍ୟା ବୋଲି ସେ ଦର୍ଶାଇଛନ୍ତି । ବିଜେପି ସରକାର ଇଡି ଏବଂ ସିବିଆଇକୁ ପ୍ରତିଶୋଧମୂଳକ କାର୍ଯ୍ୟନୁଷ୍ଠାନରେ ବ୍ୟବହାର କରିଛି ବୋଲି ସୁରେଜୱାଲା ଅଭିଯୋଗ କରିଛନ୍ତି। ଦେଶର ଆର୍ଥିକ ସ୍ଥିତି ଓ ଅର୍ଥ ବ୍ୟବସ୍ଥା ଦୁର୍ବଳ ହୋଇପଡିଛି, ଏସବୁରୁ ନଜର ହଟାଇବା ପାଇଁ ବିଜେପି ଚିଦମ୍ବରମ୍ଙ୍କ ଗିରଫଦାରୀ ନାଟକ ଚଳାଇଛି । ବିଜେପି ଉପରେ ପ୍ରବଳ ବର୍ଷି ସୁରେଜୱାଲା ଏଭଳି ଅଭିଯୋଗ କରିଛନ୍ତି।
ଅନ୍ୟପକ୍ଷରେ ଚିଦମ୍ବରମଙ୍କ ସପକ୍ଷରେ ଆଗକୁ ଆସିଥିବା କଂଗ୍ରେସର ପ୍ରମୁଖ ନେତାମାନଙ୍କୁ ବିଜେପି ସମାଲୋଚନା କରିଛି। ଗଣମାଧ୍ୟମ ସହ ଆଲୋଚନା ବେଳେ ବିଜେପି ମୁଖପାତ୍ର ଜି.ଭି.ଏଲ୍. ନରସିହ୍ମା ରାଓ ଅଭିଯୋଗ କରିଛନ୍ତି ଯେ ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧି ଭାଦ୍ରାଙ୍କ ଭଳି ନେତାମାନେ ଯେଉଁଭଳି ଭାବରେ ତାଙ୍କୁ ସମର୍ଥନ କରିଛନ୍ତି ଏଥିରୁ ଜଣାପଡ଼ୁଛି ସେମାନଙ୍କର ଛତ୍ରଛାୟା ତଳେ ଏହି ଦୁର୍ନୀତି ଘଟିଛି। ଏହି ବରିଷ୍ଠ କଂଗ୍ରେସ ନେତାଙ୍କ ବିରୁଦ୍ଧରେ ସିବିଆଇ ଏବଂ ଇଡିର କାର୍ଯ୍ୟାନୁଷ୍ଠାନ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ହେଉଥିବା ଅଭିଯୋଗକୁ ଖଣ୍ଡନ କରି ଶ୍ରୀ ରାଓ କହିଛନ୍ତି, ଉଚ୍ଚନ୍ୟାୟାଳୟ ଏହି ମାମଲାରେ ଶ୍ରୀ ଚିଦାମ୍ବରମ୍ଙ୍କୁ ମୁଖ୍ୟ ଷଡ଼ଯନ୍ତ୍ରକାରୀ ବୋଲି ବର୍ଣ୍ଣନା କରିଛନ୍ତି।
ସେହିପରି ଆୟକର ମାମଲାରେ ତାଙ୍କ ବିରୁଦ୍ଧରେ ଚାଲିଥିବା ନ୍ୟାୟିକ ପ୍ରକ୍ରିୟାକୁ ଖାରଜ କରିବା ପାଇଁ ପି. ଚିଦାମ୍ବରମ୍ଙ୍କ ପୁତ୍ର କାର୍ତ୍ତି ଚିଦାମ୍ବରମ୍ କରିଥିବା ଆବେଦନକୁ ମାଡ୍ରାସ୍ ହାଇକୋର୍ଟ ଅଗ୍ରାହ୍ୟ କରିଦେଇଛନ୍ତି।
